Ministeriu Solidariedade Sosial apoia $75,446,00 ba organizasaun Forum Komunikasaun Joventude, ho objetivu atu sira bele tau atensaun masimu ba situasaun labarik minoridade ne’ebe buka moris iha dalan ninin, liu-liu iha capital Dili.
Vice Ministru Solidaridade Sosial (MSS), Jacinto Rigoberto Gomes hateten, orsamentu ida ne’e mai husi orsamentu Jeral Estadu 2013 nian, MSS aloka ba organizasaun Forum Komunikasaun Joventude (FCJ) nudar parseiru atu resolve problema trabalhu infantile iha sidade laran.
“Hein katak ho orsamentu ida ne’e ita bele hala’o servisu ho diak tanba ita nia labarik minoridade barak mak fase kareta no sai pembantu entau ho ida ne’e ita bele tau matan ba sira,” dehan Vice Ministru Rigoberto, (19/040 hafoin asina momerando entendimentu ho parseirus sira iha Bemori Dili.
Nia dehan, problema trabalhu infantile kompleksu tebes tanba ne’e governu iha dever hodi fo atensaun ba sira, hakonu sidadaun sira nia direitu.
Nia hatutan, organizasaun FCJ nudar organizasaun uniku iha Timor-Leste ne’ebe fo atensaun no protesaun ba labarik sira ne’ebe moris iha luron ibun.
Entretantu Diretor Interino FCJ, Viriato Alves Lobato fo agradese ba MSS tanba fo ona konfiansa ba sira no promote sira sei ezekuta ho diak orsamentu ne’ebe iha maske la fasil.
Nia hatutan, ho orsamentu ne’ebe iha, sira sei halo survey ida hodi identifika labarik hira mak asesu ona ba iha edukasaun non formal hafoin integra fali ba familia iha tinan 2011-2012 no programa trabalhu infantil iha Distritu Dili.
“Ami fo prioridade ba problema Kaikoli, labarik fase kareta iha ne’eba, oinsa atu halo dialogu ho komunidade sira iha bairo ne’e atu hare problema labarik sira ne’ebe fase kareta ne’e,” dehan Diretor Interino FCJ ne’e.
Alem de problema Kaikoli, sira mos sei fo atensaun ba labarik sira ne’ebe moris ho hili foer iha lixu fatin no sei kria atividade animasaun iha loron nasional labarik fulan Julhu fulan oin.
Nia afirma, iha orsamentu tinan kotuk FCJ hetan apoiu husi MSS ho montante $15.000 atu rezolve problema Kaikoli nian liu –liu fase kareta maibe la konsege rezolve.
“Ami konsege ezekuta orsamentu ne’e to’o hotu duni maibe ami failha iha relatorio mak tarde latuir data detlain ne’ebe governu fo,” Diretor Lobato tenik.
