Fo atensaun rigorozu liu ba projetus dezenvolvimento presiza halo atu hadia efetividade suporta ne’ebe fo ba Timor-Leste, tuir konsensu ne’ebe hetan durante Reuniao Anual Parseirus Dezenvolvimentu iha Dili.
Konferensia anuál loron-rua ne’e hala’o atu kordena ho diresaun asistensia dezenvolvimentu iha Timor-Leste, ne’ebé kontribui ona $213.9 milaun ba nasaun tinan kotuk.
Iha TLDPM parseira dezenvolvimentu no governu Timor-Leste konkorda ona atu halo sistema foun hodi fiskaliza projetu dezenvolvimentu sira nune’e bele apoia efetivu liu tan
Mekanismu foun balun inklui planu asaun anuál ba kada setór no sorumuto trimestralmente kona-ba progresu ba stakeholder iha kada setór.
Sorumuto mos diskute kona-ba dezafiu hasoru dezenvolvimentu iha Timor-Leste no preokupasaun kona-ba kualidade edukasaun ladi’ak, sistema justisa ne’ebé fraku no menus rekursu umanu iha instituisaun governu sira nia laran.
Primeiru Ministru Xanana Gusmão katak agora iha ona komitmentu ne’ebe forte husi parseiru dezenvolvimentu atu atinzi objetivu iha governu nia Planu Stratejiku Dezenvovimentu 2010.
“Dezafiu sira ba dezenvolvimentu bele rezolvidu se ita servisu hamutuk ho responsabilidade no komitmentu ne’ebé forte,” dehan PM Gusmão
Diretór Komisaun Europa Gerhad Sabathil husu governu Timor-Leste atu fó rekursu umanu ba ministeriu sira atu kontribui ba sorumuto trimestralmente.
“Presija iha kompriensaun ne’ebe di’ak katak kordenasaun mak responsabilidade rekursu ida ne’ebe intensivu, ida ne’e labele efetivu excepto kuando komete loloos ona rekursu umanu ne’ebe sufisiente” dehan Diretor Gerhard
Dr Sabathil mos husu ba kada ministeriu atu kria sira-nia planu harii kapasidade rasik nune’e doadór sira bele apoia sira di’ak liu tan.
Xefe AusAID, Vincent Ashcroft dehan, Timor halo ona progresu ne’ebe barak, liu – liu iha área kresimentu ekonomia maibé ne’e presija tempo ne’ebé naruk ba benefisiu sira ne’e atu to’o ema sira
“Kresimentu sei han tempo ne’ebé naruk atu halo diferensia ba ema kiak sira-nia moris no hanesan sasukat ida ne’ebe la hateten mai ita kona-ba diferensia ka ema sira-nia moris.”
