Iha labarik feto oan ida desde moris mai afeta kedas moras Hivchsprung’s Disease (tee fatin laiha) no agora halo tinan rua ona no durante ne’e nia sente terus bo’ot bainhira atu soe foer bo’ot, tanba ne’e Klinika Bairo-Pite, sei bolu doutor espesialista husi Nova Zelandia hodi halo operasaun.
Diretor Klinika Bairo-Pite (KBP), Doutor Daniel Murphy dehan, doutor espesialista sira halo ona operasaun dala ida ba labarik ne’e desde moris to’o agora.
“Espesialista husi Nova Zelandia mak operasi labarik ne’e hodi tau fali nia tee fatin iha fulan oin mai,tanba moras ne’e foin akontese,” dehan Doutor Daniel Murphy, foin lalais, iha Bairo-Pite,Dili.
Doutór Dan konta, labarik ne’e moris iha Ospital Nasional Guido Valadares (HNGV) iha tinan rua liu ba, iha momentu ne’eba kedas doutor sira halo kedas operasi halo tee fatin iha nia kabun, no durante nia soe foer liu husi kabun.
“Triste bo’ot, tanba durante tinan rua ona labarik terus liu atu hasai foer bo’ot, tan ne’e ami bolu Doutór Espesial husi Nova Zelandia maka mai atu halo operasaun, halo operasaun iha HNG hodi halo fali kidun foun tanba iha ne’e fatin laiha atu halo operasaun,” tenik Doutor Dan.
Nia rekonese katak, moras ne’e oin foun ida no maske difisil maibe ho doutor espesialista, iha posibilidade atu hetan operasaun ho diak. “espera katak operasaun ne’e bele la’o ho diak, liu-liu bele salva nia vida,” Doutor Dan esperansa.
Iha parte seluk membru Komisaun F (Edukasaun, Saúde), Deputadu Eladio Faculto dehan, moras ne’e perigu no presiza fo asistensia imediata ba pasiente ne’e.
“Presiza koordena ho diak entre klinika ho Ministeriu Saude, oinsa mak bele salva pasiente ne’e nia vida,” sujere Deputadu Faculto.
Deputadu ne’e mos husu ba doutór espesialista husi Nova Zelandia ne’ebé sei halo operasaun ba pasiente ne’e, atu koopera ho doutór Timor oan nune’e operasaun ne’e diak no susesu,” Deputadu Faculto sujere.
