Administrador Distritu Bobonaro, Domingos Martins husu ba Parlamentu Nasional atu aselera diskute Lei Poder Lokal nian ne’ebe to’o agora sei pendent hela iha komisaun nian.
Nia dehan, estabelesementu Kamara Munisipiu (KAMUS) iha tinan 2014 ne’e bele kansela se kuandu lei poder local no lei munisipiu seidauk aprova iha Parlamentu Nasional.
Administrador Martins afirma, objetivu husi Kamara Munisipiu mak governu sentral fo poder ba governu local atu jere rasik sira nia distritus.
“Mesmu Primeriu Ministru mai ona halo sosializaun kona ba Kamara Munisipiu maibe kuandu lei poder local no lei eleisaun munisipiu seidauk aprova, hanesan deit,” dehan Administrador Distritu Bobonaro, Domingos Martins, foin lalais, iha Maliana.
Tanba ne’e nia sujere ba Parlamentu Nasional atu lei ne’e tau ona iha agenda ba tinan ne’e hodi bele diskuti iha parlamentu, nune’e estabelesementu KAMUS bele la’o ho diak.
Iha lidun seluk Deputadu Inacio Moreira hateten, dadaun ne’e governu prepara hela proposta lei ida kona ba desentralizaun poder local ne’e.
“Audiensia parese halo ona, lolos ne’e tenke mai ona aprezenta iha parlamentu hodi nune’ e parlamentu sei halo diskusaun klean kona ba ida ne’e,” dehan Deputadu Moreira.
Nia hatutan, lolos ne’e antes Primeiru Ministru ba halo sosializasaun kona ba esteblesementu KAMUS iha distritus, lei poder local no munisipiu nian aprova ona, nune’e bele ba halo sosializasaun ba lei ne’e dala ida deit.
