Kazu asidente trafiku bis Viqueque ne’ebe baku fila iha area Cristu Re’i nian foin lalais ne’e rezulta ema nain tolu hetan kanek todan iha akontesementu ne’e.
Komandante Polisia Tranzitu Nasional, Inspektor Xefe Antonio L.C. Soares esplika katak, bis ne’e mai husi Viqueque atu ba Dili, maibe wainhira atu sae ba subida (foho oan Cristu Re’i nia kotuk) kareta forsa laiha, ne’e duni kareta baku fila ba kotuk.
“Ema mate laiha, maibe kanek todan iha ema nain tolu no kanek kma’an iha ema nain 19 hanesan ne’e,” dehan Komandante POLTRANS, Inspektor Xefe Soares, foin lalais, iha Kaikoli,Dili.
Nia hatutan, pasajeirus hirak ne’ebe kanek todan no kma’an lori kedas ba Ospital Nasional Guido Valadares (HNGV) no agora balun kanek kma’an) alta ona, so kanek todan mak seidauk. “Kontinua halo tratamentu,” tenik Komandante Soares.
Kona ba patraun ba bis ne’ebe baku fila ne’e, nia dehan, mai tiha ona iha estasaun polisia nian no pronto atu responsabiliza ba ema sira ne’ebe mak kanek ne’e.
Iha lidun seluk Deputadu Mateus de Jesus hateten, mesmu iha asidente ne’e la rezulta ema mate, maibe presiza toma atensaun.
“Tuir hau nia observasaun, bis ne’e baku fila tanba tula ema barak liu,” dehan Deputadu de Jesus.
Tanba ne’e nia sujere ba Polisia Tranzitu nian atu kontrola kareta sira ne’ebe halai ba distritus atu labele tula ema no sasan liu kareta nia kapasidade ne’ebe iha.
“Tula pasageiru labele barak liu fali kareta nia forsa no toma atensaun mos ba pasageiru sira labele tabele iha kareta sira ne’e,” sujere Deputadu de Jesus.
