Membru Parlamentu Nasional kontinua preokupa no levanta iha plenaria parlamentu kona ba kondisaun Roo Nakroma ne’ebe to’o ohin governu seidauk halo manutensaun maske grave ona.
Deputadu Inacio Moreira, hateten Roo Nakroma agora dadaun ho kondisaun grave tanba bainhira halo viajen ba Oe-Cusse no Atauro, sempre para tutuir iha dalan.
“Se derepenti deit mak mout iha tasi laran, hau la hatene povu sei halo saida ba ita bo’ot sira,” preokupa Deputadu Inacio Moreira, foin lalais, iha Parlamentu Nasional.
Tanba ne’e nia husu ba Ministeriu Transportes no Telekomunikasaun atu halo manutensaun lalais ba Roo Nakroma tanba orariu manutensaun liu tiha ona.
“Makina ensim ladiak no odamatan mos tohar tiha ona agora,” Deputadu Moreira preokupa.
Hatan ba preokupasaun ne’e,Vise Ministru Transportes no Telekomunikasaun, Flavio Cardoso Neves katak,nia parte fo ona atensaun ba kapitaun Roo Nakroma katak kuandu roo laiha kondisaun, labele halo operasaun, tenke para.
“Maibe hau hakarak hateten katak, kompara roo ne’ebe ita atu troka agora ne’e, ita nia kondisaun roo luxu liu,” tenik Vise Ministru Neves.
Tanba ne’e, nia dehan, sira sei buka roo ne’ebe nia kondisaun diak liu, wainhira Roo Nakroma halo manutensaun .
Kona ba kontratu atu halo manutensaun, nia afirma, agora hein deit atu asina tanba buat hotu preparadu ona.
