Governu Japaun fornese projetu fundu asistensia kona ba kanal irigasaun no fornesementu bee moos ba komunidade iha area rural iha Distritu Ainaro, Bobonaro, Liquisa no Distritu Manatuto.
Embaixador Japaun iha Timor-Leste,Yoshitaka Hanada hateten, projetu fundu asistensia ne’e sei kontribui ba dezenvolvimentu setor agrikultura inklui hadia kanalizasaun bee moos no sanemanetu iha area rurais sira.
“Hau espera katak, apoia hirak ne’e bele kontribui hodi hadia vida moris komunidade lokal liu husi implementasaun projetu hirak ne’e,” esperansa Embaixador Yoshitaka Hanada, hafoin asina kontratu ho NGO hat ne’ebe sei implementa projetu hirak, foin lalais, iha Dili.
Total orsamentu ba implementasaun projetu hirak ne’e hamutuk $460 milioens, enkuantu NGO hat ne’ebe manan tender ba projetu ne’e mak NGO Joventude Esperansa ba Futuru (JEF), NGO Haburas Moris, NGO Aplimentec Foundation no NGO Sentru Uniaun Nasional Tekniku Dezenvolvementu Timor-Leste (SUNTDTL).
Nia dehan , NGO JEF ho osan $122,951 mil hodi halo konstrusaun kanal irigasaun Casa iha Distritu Ainaro, Haburas Moris $122,951 mil ba konstrusaun irigasaun iha Suku Meligo iha Distritu Bobonaro, Aplimentec Foundation NGO sei halo prosesu instalasaun fornesementu sistema bee moos iha Suku Dato Foho iha Distritu Liquisa ho $115,395 mil no NGO SUNTDTL sei kaer projetu instalasaun fornesementu bee moos ho osan $108,528 mil.
Embaixador Hanada hatutan, iha tinan 2013 iha ona projetu 30 resin mak implementa ona iha distritus hotu iha Timor-Leste.
Projetu hirak ne’ebe finansia husi governu Japaun mak hanesan fornesementu bee sistema moos, kanal irigasaun, rehabilitasaun eskolas no infraestruturante importante sira seluk ba komunidade local sira.
Alem de ne’e Reprezentante Diretor NGO Aplimentec Foundation, Francelino hateten, sira nia NGO kaer obra iha area bee moos, saneamentu no jestaun rekursu naturais.
“Tanba ne’e ha lori komunidade suku Dato distritu Liquisa, hato’o agradese bo’ot ba Governu Japaun ne’ebe ajuda ona komunidade distritu Liquisa,” Reprezentante Francelino agradese.
Nia hateten, komunidade Suku Dato ne’ebe sei hetan benefisiu husi projetu ne’e hamutuk 492 tanba ne’e sira sei servisu maka’as atu komunidade sira iha fatin ne’e bele mos asesu ba bee moos.
Iha sorin seluk Celco Amadio, Diretor Interino Diresaun Nasional Bee Moos iha Sekretariu Estadu Agua Saneamentu e Urbanizasaun hateten, apoia hirak ne’e importante tebes, liu-liu iha Distritu Manatuto no Liquisa tanba durante ne’e distritu rua ne’e mak infrenta problema bo’ot kona ba bee moos nian.
“Hau lori governu liu husi Sekretariu Estadu nia naran hato’o agradese bo’ot ba Embaixador Japaun no povu Japaun ne’ebe apoia ona ami iha area bee moos nian,” agradese Diretor Interino Amadio.
Diretor ne’e hateten,Governu Japaun la’os apoia deit bee moos ba komunidade maibe liu husi sira nia Ajensia JICA mos fo ona kapasitasaun ba tekniku sira iha area bee moos ninian.
“Ami hein katak,ida ne’e bele ajuda ami oinsa bele servi ami nia povu ba oin,” tenik Diretor interino ne’e.
Iha fatin hanesan Diretor Jeral Ministeriu Agrikultura e Peskas(MAP),Lorenco Fontes apela ba NGO hat ne’ebe kaer obra hirak ne’e atu iha kordenasaun ne’ebe diak no tenke ho kualidade mos.
“Se karik irigasaun tenke ligasaun diak ho tekniku irigasaun ho Ministeriu Agrikultura e Peskas iha distritu, karik buat ruma mosu iha ne’eba tenke koopera ho ministeriu,” Diretor Jeral Fontes apela.
