Atu regula orgaun telekomunikasaun ne’ebe eziste iha Timor-Leste, Ministeriu Transporte no Telekomunikasaun halo hela rekrutamentu ba prezidente orgaun reguladora ninian.
Vise Ministru Transportes no Telekomunikasaun, Flavio Cardoso Neves katak, dadaun ne’e iha ona aplikante nain hitu (7) mak apply ona ba iha vaga ne’e.
“Hau hare iha nain hitu mak hatama ona nia aplikasoens, hau fiar katak iha Abril nia laran ita hetan ona se mak sai prezidenti regulador,” tenik Vise Ministru Neves, foin lalais, iha Dili.
Nia hatutan, hafoin prezidenti regulador identifika tiha mak foin bele halo tan rekrutmentu ba funsionariu sira tuir nesesidades ne’ebe iha.
Entretantu tuir Depputadu Inacio Moreira katak, governu presiza duni kria orgaun regulador ida nune’e bele regula telekomunikasaun ne’ebe eziste iha rai laran.
“Se orgaun reguladora ninia regulamentu mak seidauk estabelese, hau husu ba imi diak liu para,” tenik Deputadu Moreira.
Tanba tuir nia, iha artigu 39 kapitulu 8 koalia ona kona ba telekomunikasaun ninian, katak telekomunikasaun hotu tenke halo interligasaun.
“Lei ne’e ita bo’ot sira mak halo,se ida ne’e seidauk iha, nusa mak ita bo’ot sira halo uluk akordu,” Deputadu Moreira preokupa.
Deputadu ne’e kritika, tanba governu liu husi Ministeriu Transporte no Telekomunikasaun asina uluk akordu kona ba interligasaun nian, maibe orgaun regulador seidauk iha.
