Maske Korea du Sul no Korea du Norte iha presaun maka’as atu halo funu, maibe tuir Sekretariu Estadu Politika Formasaun Profesional no Empregu katak, situasaun em jeral normal, liu-liu trabalhador Timor oan iha Korea du Sul agora dadaun ho kondisaun diak no seguru.
Sekretariu Estadu Ilidio Ximenes da Costa hateten, governu Korea du Sul sempre iha korajen nafatin hodi buka dalan ba trabalhador Timor oan sira iha ne’eba.
“Iha ne’eba buat hotu la’o normal, laiha ema ida mak kanek no tohik sira nia liman, foin horkalan ita nia adidu du trabalhu iha ne’eba haruka informasaun mai hau katak situasuan iha ne’eba diak hela,” dehan SE Ilidio Ximenes da Costa, iha Balide, Dili.
Nia dehan, sekarik iha Korea akontese funu,Governu Korea ho Governu Timor-Leste bele halo evakuasaun trabalhador sira ba fatin ne’ebe seguru.
Total Trabalhador ne’ebe oras ne’e dadauk servisu iha Korea hamutuk ema nain mil duzentus e onzi (1.211).
Entretantu Deputadu Jacinto Viegas Vicente(Roque) sujere ba governu atu buka fatin ne’ebe seguru ba trabalhador sira karik situasaun iha Korea do Norte ho Korea do Sul komesa manas ona.
“Tanba iha semana hirak liu ba Korea do Sul mos dehan katak, sira sei evakua hotu embaixadas iha ne’eba tanba labele garante seguransa ba sira, bainhira akontese funu entre nasaun rua ne’e,” tenik Deputadu Vicente.
Enkuantu Deputadu Paulino Monteiro dehan, maske situasuan agora la’o normal maibe la sala kuandu governu mantein pozisaun, karik derepente mosu funu entre nasaun rua ne’e.
“Ita livre atu ba deit, so ke ita hanoin mak ita ba infrenta armas pezadas (kilat bo-bo’ot) hanesan ohin hau dehan misel matan laiha, ne’e mak ita tenke atensaun ba buat sira ne’e,” dehan Deputadu Monteiro.
