Membru Parlamentu Nasional lamenta tanba martires sira nia oan balun to’o agora la hetan bolsu estudus husi governu.
Deputada Domingas Alves da Silva(Bilou-Mali), iha plenaria hateten, to’o agora martires nia oan kuaze 400 resin mak hetan ona bolsu estudu ba iha rai liur maibe barak liu mak seidauk hetan.
“Hau preokupa nafatin tanba Saudozu sira ne’ebe mate iha gerilha,liu-liu ba falintil sira nia oan barak mak la hetan bolsu estudu to’o agora,” lamenta Deputada Biloumali, foin lalais, iha PN.
Nia fo ezemplu katak, to’o agora Deputada Ilda Maria da Conceicao nia oan seidauk hetan bolsu estudu.
“Hanesan mos deputada Bisoi ninia bin ninia oan mos la hetan bolsu estudu,” preokupa Deputada Biolu-Mali.
Tanba ne’e nia sujere ba Sekertariu Estadu Asuntus Kombatentes ba Libertasaun Nasional, atu taka sai naran martires sira nia oan ne’ebe hetan ona bolsu estudu atu nune’e ema hotu bele hatene.
Hatan ba lamentasaun ne’e Sekretariu Estadu Asuntu Komabatentes ba Libertasaun Nasional, Julio Sarmento da Costa (Meta Malik) katak, atu hetan bolsu estudus tenke priense kriteria ne’ebe mak iha.
“Tenke eskola mak foin bele priense kriteriu,kuandu la eskola sei la hetan,” tenik SE Metan Malik.
Iha orsamentu jeral do estadu tinan 2013, ba programa bolsu estudu iha Sekretariu Estadu hamutuk $200,000.
“Kandidatu bolseiru ba tinan ne’e iha ema nain 266, maibe agora sei hein despaixu husi ministra, depois publika iha jornal republika, par abele sai hanesa kampanha ida hodi tun to’o karik hafoin bele hatama rekerimentu ba ida ne’e,” tenik SE Metan Malik.
Sekretariu hateten,bele hatama rekerimentu 200 to’o 300 maibe kriteria mak determina se mak bele liu no se mak labele liu.
