Trabalhador nain 10 ne’ebe servisu iha Korea du Sul deporta fali mai Timor-Leste tanba sira komete krime iha ema nia rain.
Diretór Nasional ba Emprego (DNE),Paulo Alves hateten, sira nain sanulu ne’e sira nia kreditu iha banku balun selu hotu ona.
“Sira ne’ebé mak kategoria 2009, 2010 iha balun mak seidauk fó fila sira nia kréditus maibé sira ne’ebe iha 2011 ba leten ne’e kuaze sira selu hotu ona,” hateten Diretor Nasional Empregu, Paulo Alves, foin lalais, iha Balide, Dili.
Nia dehan, nain sanulu ne’e, nain ida deporta iha tinan 2011, 2012 nain hat no foin lalais iha nain lima tan mak deporta fila mai.
“Hetan deportasaun tanbá komete kazu krime iha Korea e sira ne’e mesak mane deit,” tenik Diretor Alves.
Nia afirma, haruka trabalhador Timor oan ba iha Korea nudar parte ida hodi redus numeru dezempregu iha rai laran e mos hanesan meius ida oinsa mak bele hadia kondisaun moris familia nian.
“Tanba ne’e ami sempre fo hanoin katak ita bo’ot sira mak deside rasik atu buka osan e aumenta imi nia koñesimentu entaun servisu ba labele tama situasaun irregularidade ou illegál iha Korea do Sul,” Diretor Alves fo hanoin.
Entretantu membru Komisaun F Parlamentar (Saúde, Edukasaun,Kultura, Veteranus no Igualidade Jéneru), Deputadu Eladio Faculto, katak wainhira ba moris iha ema nia rain tenke adapta an.
“Ita iha Timor halo tuir leis no regras ne’ebe iha, tanba sa mak ba ema nia rain labele halo tuir ema nia leis ne’ebe iha, so ita ba planeta seluk mak laiha lei karik,” dehan Deputadu Faculto.
Tanba ne’e nia husu ba trabalhador sira atu kumpri no adapta an ho kultura iha nasaun ne’ebe deit mak sira ba inklui iha Korea du Sul, nune’e labele halo deportasaun.
“Ha’u husu sira ne’ebé oras ne’e servisu iha ne’ebá hatudu komportamentu di’ak no moris tuir hanesan sidadaun Timor, hatudu dignidade no integridade polítika Timor nian ba rai liur, nune’e loron ikus ita nia parseiru dezenvolvimentu sira halo relasaun diplomatikus ho nasaun seluk nafatin para loke dalan hodi fó kampu de trabalhu,” Deputadu Faculto sujere.
Entretantu João Ribeiro, nudar joventude ida ne’ebe sei dezempregu hela, sente triste ho attitude maluk trabalhadores sira nian, tanba bele impede jerasaun tuir mai atu ba servisu iha Korea.
“Ema la fiar ona ita, tanba kolega sira ba uluk hatudu jestu hanesan ne’e bele impede fali ita, se bele governu haree didi’ak wainhira halo selesaun ba valores ne’e,” Ribeiro sujere.
