Prezidente da Republika, Taur Matan Ruak sente preokupadu tebes ho kazu insestu no violensia domestika ne’ebe akontese ba feto no labarik feto buras iha Timor-Leste.
Sekretaria Estadu Promosaun Igualidade (SEPI), Idelta Maria Rodrigues hato’o kestaun ne’e hafoin hasouru malu ho Xefe Estadu, Taur Matan Ruak (TMR), iha Palasiu Prezidente, Nikolao Lobato, foin lalais, iha Bairo-Pite, Dili.
“Iha preokupasaun barak, ita sei iha problema insestu, violensia domestika, pornografia ne’ebe espaila iha Timor laran,” dehan Sekretariu Estadu Idelta Maria Rodrigues.
Nia dehan, iha hasouru malu ne’e, Prezidente TMR promete sei fo atensaun maka’as ba asuntu jeneru hodi dezenvolve diak liu tan iha future, tanba durante ne’e feto mak vulneravel liu.”Presiza atensaun seriu,”tenik SE Rodrigues hodi hasara Prezidente nia liafuan.
Preokupasaun hanesan mai mos husi Prezidente Grupu Feto Parlamentar (GMPTL), Deputada Josefa Alvares Soares, katak violasaun ida ne’e krimi no tenke prosesa tuir lei ne’ebe vigor iha nasaun ne’e.
“Buat ne’ebe hau hare mak ema laiha seriadade atu implementa lei ne’e nune’e mos kondisoens iha uma laran mak la premite entau fasil atu akontese aktu ida ne’e,” tenik Deputada Alvares.
Nia hatutan, aktu ida ne’e fasil atu akontese iha uma laran bainhira ema hela hamutuk tantu inan aman, oan no subrina maibe laiha bareira ne’ebe seguru.
“Toba hamutuk deit, odamanta kuartu laiha xave entaun fo espasu atu akontese aktu sira hanesan ne’e,” katak Deputada Alvares.
Maske nune’e, nia sublina, dadaun ne’e la presiza kria lei espesifiku ba asuntu ida ne’e maibe karik ba futuru tanba iha ona Lei Kodigu Penal no Lei Violensia Domestika iha artigu balun ne’ebe kondena mos violasaun seksual.
