Laboratorium Klinika Polisia Nasional Timor-Leste durante ne’e la funsiona ho diak tanba falta de rekursu humanu.
Xefe Klinika Polisia Nasional Timor-Leste (PNTL), Inspektor Abilio de Araujo hateten, durante ne’e servisu iha laboratorium klinika ne’e paradu tanba rekursu laiha.
“Ami foin maka haruka ami nia ema ida ba eskola iha Kediri-Indonezia no nia sei fila iha 2014,” dehan Xefe Klinika PNTL, Insopektor Abilio de Araujo, iha Kaikoli, Dili.
Durante ne’e, nia afirma, wainhira iha membrus balun moras no presiza laboratorium entaun tranfere ba iha Ospital Nasional Guido Valadares (HNGV).
“Wainhira sira hetan ona rezultadu, sira entrega fali mai ami ho prosesu ne’ebe maka lais,” dehan Xefe Klinika PNTL ne’e.
Iha lidun seluk Deputadu Inacio Moreira hateten, ne’e kestaun ne’ebe presiza hetan atensaun husi governu, tanba rekursu humanu ne’e buat ne’ebe maka importante tebes.
“Instituisaun PNTL presiza duni fasilidade hanesan laboratorium, e sira iha ona fasilidade ne’e maibe la hanoin hetan oinsa para bele prepara rekursu humanu, ne’e maka problema,” Deputadu Moreira preokupa.
Maibe nia dehan, iha pasu diak ida tanba komesa haruka ema nain ida ba eskola hosi hasai estudu kona ba area ida ne’e, atu nune’e wainhira fila mai laboratorium ne’e bele funsiona.
“Ita hein katak sira bele prepara planu ne’e ho didiak, atu prepara ema hodi servisu iha laboratorium ne’ebe loke ona iha institusaun refere,” Deputadu Moreira esperansa.
