Lei Pensaun Vitalisia ne’ebe durante ne’e sai preokupasaun ema hotu nian tanba benefisia liu ba eis titulares sira, seidauk bele debate hodi halo alterasaun tanba bankada ida-idak seidauk halo consensus kona ba lei ne’e.
Deputadu Paulino Monteiro Soares Babo hateten,ida ne’e prioridade duni atu debate maibe to’o agora bankadas hotu iha Parlamentu
Nasional seidauk consensus komun ida kona ba lei ne’e.
“To’o agora ami ida-idak koalia hela iha liur oinsa mak muda ga redus pensaun vitalisia ne’e rasik,” dehan Deputadu Paulino Monteiro Soares Babo, foin lalais, iha parlamentu Nasional.
Iha fatin hanesan , Deputadu Arao Noe husi bankada Congresu Nasional Rekonstrusaun Timor (CNRT),katak to’o agora sira seidauk simu projetu de lei ne’e.
Nia dehan, iha segunda lejislatura lei ne’e tama duni iha Parlamentu Nasional maibe la konsege aprova .
“Lei ne’e atu altera ba eis titulares nia pensaun atu fo persentajen hira ba vensimentu aktual,” tenik Deputadu Noe.
Tanba tuir nia, iha lei ne’e vensimentu eis deputadu sira nian nafatin 100 pursentu hanesan ho deputadu ativu.
Enkuantu Deputada Ilda Maria da Conceicao husi bankada Fretilin dehan, lei ne’e sira nia bankada rasik mak aprezenta iha segunda lejislatura hodi halo alterasaun ba meja maibe la konsege.
Deputada ne’e esplika, vensimentu ne’ebe eis titulares, liu-liu deputadu sira simu kada fulan ne’e ½ husi sira nia salariu pokok ne’ebe iha.
“Ema barak koalia no hanoin katak, vensimentu eis deputadu sira nian tres mil dolares,maibe la’os tres mil, lolos ne’e $1,500 kada fulan sira simu,” esplika Deputada da Conceicao.
Nia esplika, Deputadu sira nia salariu sae ba $3,000 tanba deputadus barak mai husi distritu, entaun sira presiza halo ba alojamentu no komunikasaun, ne’e mak sae to’o $3 mil.
“Deputadus ativu sira simu tres mil maibe la aitvu ka eis ona sira simu $1,500,” Deputada Ilda esklarese.
