Ministeriu Justisa dadaun ne’e presiza tan kareta 24 hodi fasilita servisu ministeriu nian ho diak liu tan.
Vise Ministru Justisa, Ivo Jorge Valente hateten, Ministeriu Justisa (MJ) hatama ona proposta ba Diretor Jeral Ministeriu Finansas (MF) nian atu bele oferese kareta hamutuk 24 ne’e ba ministeriu ne’e.
“Ofisialmente eskrita ami hakerek pedidu ida ba patrimonio estadu liu husi diretor jeral, ami husu kareta hamutuk 24,” dehan Vise Ministru Justisa, Ivo Jorge Valente, iha Colmera, Dili.
Maske nune’e, nia seidauk garante katak kareta 24 ne’e bele mai hotu tanba agora iha ministeriu barak ne’ebe mos falta transporte.
“Ita la hatene karik 24 ne’e bele mai hotu ou sira hatun ba 15 ou 16 carros deit,” tenik Vise Ministru Justisa.
Nia dehan, agora dadaun presiza los kareta tanba bainhira lei rai nian aprova iha Parlamentu Nasional, ekipa ministeriu nian tenke tun ba baze hodi sosializa ba komunidade sira kona ba lei ne’e.
Iha lidun seluk Deputada Josefa Alvares Soares hateten, transporte ne’e importante tebes atu hala’o servisu ruma.
“Sira hetan kareta ne’e diak liu tan, atu nune’e bele fasilita sira nia sevisu hodi haklaken leis ne’ebe sei aprova husi Parlamentu Nasional,” apoia Deputada Soares.
Deputada ne’e mos husu, karik sira hetan duni kareta hirak ne’e, importante tenke halo manutensaun ho rutina, nune’e kareta sira ne’e bele dura no uja kleur.
