Oras ne’e dadaun iha labarik minoridade nain 21 mak detein hela iha prizaun Becora, tanba sira hirak ne’e sai suspeitu ba kazu ne’ebe sira involve.
Vise Ministru Justisa, Ivo Jorge Valente dehan, sira hirak ne’e balun komete krime iha fulan hirak liu ba ne’e maibe juis sira absolve tanba laiha provas ne’ebe sufsiente atu sira tama iha prizaun maibe se provas klaru duni sira tenke detein duni iha prizaun.
“Agora dadaun ita iha 21 destidus iha sela Becora, sira iha sela ne’ebe ketak,” dehan Vise Ministru Justisa, Valente, iha Colmera, Dili.
Nia dehan, ba future kuandu iha ona Sentru Rehabilitasaun ba Labarik, mak sei muda sira no tau iha sentru ne’e hodi fo formasaun ida diferente ho ema adultu sira.
Prizoneirus minoridade nain 21 ne’e ho idade 18 ba leten ne’ebe hetan ona desizaun ikus husi Tribunal ho desizaun pena prizaun ne’ebe la hanesan balun tinan rua no balun tinan 10 tanba komete krime omesidu.
Entretantu, Prezidente Komisaun Nasional Direitu Labarik (KNDL), Komisaria Adalgiza Ximenes sente triste no preokupa ho situasaun sira ne’e tanba numeru labarik involve iha krime ne’e aumenta beibeik no bele afeta ba sira nia futuru.
Tanba ne’e nia afirma, KNDL hamutuk ho parseirus sira sei nafatin atu halo advokasia ba governu hodi harii lalais sentru rehabilitasaun ba labarik ne’ebe konflitu ho lei tanba sira tenke iha tratamentu espesifiku labele kahur ho prizoneiru adultu sira.
“Ami mos halo ona akompanamentu ba labarik sira ne’ebe iha prizaun hein deit atu halo analiza ba dadus kona ba sira nia preokupasaun,” dehan Komisaria Ximenes.
Alem de ne’e KNDL mos sei halo akompanamentu ba labarik sira ne’ebe iha Uma Mahon atu hatene katak labarik sira ne’e asesu duni ba justisa ka lae.
Liu husi analiza dadus sira ne’e KNDL sei halo advokasia ba instituisaun relevantes sira atu fo konsiderasaun ba labarik sira nia preokupasaun.
