Membru Parlamentu Nasional konsidera servisu Komisaun Funsaun Publiku durante ne’e seidauk efetivu liu tanba servisus iha ministeriu hotu-hotu sei atrazu.
“Liu-liu iha prosesu rekrutamentu no mos prosesu avaliasaun ba prestasaun de servisu husi funsionariu sira,to’o agora sira protesta tanba sira la sa’e eskalaun,” kestiona Deputadu Virgilio da Costa Hornai, foin lalais iha PN.
Tuir nia observasaun nota katak,durante ne’e servisu Komisaun Funsaun Publiku (KFP) ba area ida ne’e la la’o.
“Hau hanoin ita tenke ser hare ona knar ruma, tenke estra oituan para solusiona problema,” Deputadu Hornai katak.
Entretantu Prezidenti KFP,Komisariu Liborio Perreira dehan, ne’e la loos no tenke hatudu.
“Agora dehan laiha efetivu deit, ami labele kuriji,tenke hatudu area ida ne’ebe para ami bele kuriji,” dehan Prezidente KFP ne’e.
Kona ba nivel eskalaun funsiunariu publiku balun nian la sa’e, nia dehan, ne’e depende ba ministeriu ida-idak nian.
“Ne’ebe labele dehan deit komisaun nia servisu la efetivu, ne’e la’os knar funsaun publiku nian, ne’e knar ministeriu nian atu define nia forsa trabalhu,” katak Komisariu Perreira.
Komisaun Funsaun Publiku, nia dehan atu fasilita deit maibe ministeriu mak tenke hatene nia funsiunariu ne’ebe matenek, bada’en natoon, merese hetan promosaun.
