Governu Seidauk Bele Harii Sentru Rehabilitasaun Ba Labarik Iha Tinan Ne’e

0
144
This year the Ministry of Justice will design and identify a location for the new rehabilitation centre for minors.

Ministeriu Justisa seidauk bele harii Sentru Rehabilitasaun Labarik minoridade ne’ebe komete krimi iha tinan ida ne’e (2013) tanba orsamentu limitadu.

This year the Ministry of Justice will design and identify a location for the new rehabilitation centre for minors.

Vise Ministru Justisa, Ivo Jorge Valente hateten,Orsamentu Jeral do Estadu (OJE) ba tinan ida ne’e Ministeriu Justisa (MJ) propoin $500,000 liu husi Programa Dezenvolvimentu Integradu Distrital (PDID) no sira sei esforsu atu hetan osan tan hodi identifika fatin no halo dezenu ba sentru rehabilitasaun ne’e.

“Tinan ida ne’e ita so asegura dezenu no identifika deit fatin no tinan 2014-2015 mak foin bele realiza,” dehan Vise Ministru Ivo Jorge Valente, iha Colmera, Dili.

Nia hatutan, sentru ne’e sei harii iha Tibar maibe sei iha posibilidade muda ba Hera ka Metinaro tanba presiza halo estudu ida klean ba fatin ne’e bazeia ba Planu Nasional ne’ebe atu loke luan aero portu nune’e labele hasoru problema iha futuru.

Nia esperansa katak sentru ne’e tenke realize atu nune’e labarik sira ne’ebe konflitu ho lei bele rekopera fali sira nia mentalidade no aprende buat ruma hodi dezenvolve sira nia moris iha futuru.

Tanba ne’e iha Marsu fulan kotuk, Ministeriu Justisa, Ajensia Dezenvolvemetu Nasional (ADN) inklui Ministeriu Solidariedade Sosial (MSS) halo ona estudu komparativu ida iha Thailandia hodi hare oinsa atendementu ba labarik sira ne’ebe konflitu ho lei iha sentru rehabilitasaun no normas internasionais sira ne’ebe fo protesaun ba labarik.

Vise Ministru ne’ebe lidera ekipa ida ne’e hateten iha esperensia barak ne’ebe sira hetan iha vizita ne’e, oinsa atu fo atendementu ba labarik sira ne’ebe konflitu ho lei maibe la signifika katak Timor-Leste sei implementa tuir saida mak sira halo ona iha sentru rehabilitasaun maibe sei implementa tuir situasaun Timor rasik.

Iha sorin seluk, Reprezentante Organizasaun Forum Tau Matan Diresaun Protesaun Labarik, Xisto Gonsalves apresia ho inisiativu governu nian atu harii sentru rehabilitasaun ne’e tanba ne’e kompetensia governu nian atu fo atensaun ba situasaun labarik iha rai laran.

Nia hatutan, nudar nasaun ne’ebe sai ona membru ba Konselhu Direitus Humanus ne’ebe ratifika ona konvensaun lubuk ida estado iha obrigasaun atu kumpri normas sira ne’ebe hakerek iha konvensaun inklui implementa rekomendasaun husi Konvensaun Direitus Labarik fo ba estadu Timor –Leste atu asegura no protese labarik iha seitor hotu.

“Importante mak governu tenke iha seriadade atu tau osamentu no politika hodi responde ba  situasaun Labarik no interese diak labarik nian,” dehan Reprezentante Gonsalves.

LEAVE A REPLY

Please enter your comment!
Please enter your name here
Captcha verification failed!
CAPTCHA user score failed. Please contact us!