Governu Japaun sei haruka sira nia tekniku protektif ida ba iha Asosiasaun Hi’it Ema Raes Timor, nune’e bele kontribui ba ema defisiente sira iha Timor-Leste. 
Embaixador Japaun iha Timor-Leste, Yoshitaka Hanada hateten , sira deside tiha ona peritu ne’e no sei haruka iha tempu badak.
“Hahu iha fulan Julhu tinan ne’e,” tenik Embaixador Yoshitaka, bainhira inagura uma ba kadeira roda ba defisiente sira, (21/03(, iha Asosiasaun Hi’it Ema Raes Timor (ASSERT) Becora, Dili.
Hanada hatutan, governu Japaun implementa projetu oin-oin iha setor oi-oin mos desde Timor-Leste hetan nia independensia e apoia hirak ne ho objetivu atu lori ema hotu ba futuru ne’ebé nabilan.
“Ha’u fiar katak partisipasaun inklusivu husi ema idak-idak iha sosiedade ne’e esensiál no krusiál atu atinji objetivu ida ne’e, Governu Japaun hakarak ne’ebé boot tebes katak ema hotu iha Timor-Leste inklui ema defisiénsia bele hetan benefísiu husi interaksaun diplomatika entre governu Japaun no Timor-Leste,” Embaixador Hanada esperansa.
Enkuantu Diretor Interino ASSERT, Alexandre Soares hateten, total orsamentu ne’ebe governu Japaun fornese liu husi fundu asistensia seguransa humana ba area rural ba konstrusaun uma produsaun kadeira roda hamutuk $59,329.
“Ami agradese tebes tanbá embaixada ida ne’e distribui ajudus servisu ba instituisaun ida ne’e nian,” agradese Diretór Interino ASSERT ne’e.
Alem de ne’e nia dehan, iha tinan kotuk governu Japaun mos entrega tan uma ba ASSERT, enkuantu kona ba kadeira roda, sira garante katak bele ona resolve sira nia nesesidades.
“Tanbá ne’e ha’u garante katak servisu kadeira roda sei la’o di’ak liután no defisientes hamutuk rihun rua resin, hahu 2005-2013 husi 13 distritus no ami nia servisu sentralizadu, ” Diretor Interino ASSERT esperansa.
Nia dehan, kadeira roda hirak ne’e mak nudar alternative ikus, atu sira labele halo tan ain falsu no ai tonka hodi defisiente sira uja.
Iha fatin hanesan Ministra Solidariedade Sosiál (MSS), Isabel Guterres sente kontenti no agradese tanbá governu Japaun liu husi sira nia embaixada iha Timor-Leste ajuda hodi halo no inagura uma kadeiras de roda ne’e.
“Ita hotu tenke agradese ba governu Japaun liu husi embaixador tanbá sem ajuda finanseiru mos difisil tebes ita atu hetan inagura,” Ministra Guterres agradese.
Nia dehan, kadeiras roda sira ne’e ho nia pesas no depende ba ida-idak nia ukuran, “ha’u hein katak ida ne’e ema barak liután ne’ebé presiza atu uja kadeiras de rodas ,” dehan Ministra Guterres.
