Administrador Distritu Dili, Gaspar Soares hateten atu muda okupante illegal iha eis Hotel Rezende sei hein desizaun husi Diresaun Nasional Terras Propriedade.
“Husi terras propriedade mak foti desizaun, depois Administrasaun Distritu Dili fo apoiu deit,” tenik Administrador Distritu Dili, Gaspar Soares, (08/04), iha nia knar fatin, Mataudoru, Dili.
Entretantu Okupante Abrao Gusmao dehan, sira nafatin okupa fatin ne’e hodi hein desizaun ikus husi governu, liu-liu Administrasaun Distritu Dili nian hodi hamamuk fatin ne’e.
“To’o agora ema seidauk mai hateten ba ami atu sai,” tenik Okupante Gusmao.
Okupante ne’e hatutan, sira prontu atu hamamuk fatin ne’e bainhira governu foti ona desizaun hodi hasai sira.
Enkuantu Okupante seluk ne’ebe hala’o knar hanesan estudante, Silverio da Silva katak informasaun atu haruka sira sai husi fatin ne’eba kleur ona no sai iha media publiku sira maibe to’o agora seidauk.
“Sira hateten hanesan ne’e ba ami wainhira ami atu sai husi fatin ne’e sira sei bolu ami nia reprezentante iha ne’e atu koalia kona ba sai nian,” tenik Okupante da Silva.
Okupante sira ne’e maioria mai husi Distritu Baucau no Viqueque, sira nia profisaun balun servisu nudar funsiunariu publiku, estudantes, negosiantes no hala’o vida seluk tan e sira hirak ne’e okupa fatin ne’e desde tinan 2000 to’o agora.
Eis Hotel Rezende hanesan Hotel diak ida iha tempu okupasaun Indonezia nian tanba nia fatin iha los jantung kota (sidade laran), maibe hafoin Timor ukun an, fatin ne’e governu abandona tiha to’o agora.
