Sekretaria Estadu ba Promosaun Igualidade hamutuk ho Sosiedade Sivil ne’ebe reprezenta organizasaunn feto deside katak loron 03 Novembru ne’ebe nudar loron nasional ba feto Timor-Leste nudar loron feriadu nasional.
Desizaun ne’e foti bainhira Sekretaria Estadu ba Promosaun Igualidade (SEPI) halo enkontru husu opiniaun kona ba loron importante ida ne’e ho maluk feto sira husi sosiedade sivil ne’ebe durante ne’e luta no hakilar kona ba direitu feto nian.
Sekretaria Estadu Idelta Maria Rodrigues dehan, durante ne’e iha grupu feto balun kestiona kona ba loron feto nasional ne’ebe monu los iha dia 03 Novembru kada tinan, no husu ba Sekretaria Estadu atu muda tiha loron ne’e hodi tau fali iha data seluk.
Tanba ne’e iha sorumutu ne’e nia husu ba feto maluk sira hodi tau hamutuk hanoin no ideas oinsa mak bele hare kona ba loron 03 Novembru ne’e.
E iha final sorumutu loron sorin ne’e konsege deside katak loron 03 Novembru nudar loron feriadu nasional no nafatin komemora loron nasional ba feto.
“Nia selebrasaun mak ita muda ba dia 06 ka 07 Novembru hanesan ne’e tanba ita hatene katak iha dia 01 no dia 02 loron finadu nian no ema hotu feriadu, tanba ne’e ohin ita deside hamutuk katak loron 03 Novembru nudar loron feriadu nasional,” dehan SE Idelta Maria Rodrigues, (05/04), iha Tower Fatuhada, Dili.
Nia dehan, loron 03 Novembru nudar loron nasional feto deside iha dekretu lei numeru 17/2005 e deside loron ida ne’e bazeia ba historia ka luta feto nian iha tempu resistensia iha tinan 1975.
Enkuantu Membru Rede Feto, Laura Abrantes, konkorda atu mantein loron 03 Novembru nudar loron nasional feto Timor-Leste tanba loron ida ne’e deside bazeia ba historia luta Maria Tapo nia mate iha dia 03 Novembru tinan 1975 iha lina de fogo.
“Bainhira nia kaben han hela, nia troka nia kaben hodi halo vijilansia ho kilat iha liman, derepente inimigu halo asaltu, Maria Tapo foti asaun resiste hasoru inimigu no iha ne’e inimigu tiru mate kedas nia iha lina de fogo,” konta Membru Rede Feto ne’e.
Tanba ne’e nia dehan, ne’e historia no historia tenke tau tuir nia dalan e laiha razaun atu muda loron 03 Novembru ba loron seluk, “selebrasaun ita bele muda ba data seluk,” katak Abrantes.
Entretantu tuir Pezidente Konselhu Nasional Joventude Timor-Leste (CNJTL), Leovigildo da Costa Hornai katak Timor-Leste mak heroina feto uniku kompara ho nasaun sira seluk ne’ebe lahatene tuir sira nia historia.
“Hanesan iha Afrika feto sira la hatene sira nia feto maluk nia historia luta,tanba ne’e antes atu muda loron ida ne’e, hanoin no tetu didiak,” tenik Prezidente CNJTL ne’e.*
