Membru Parlamentu Nasional preokupa tebes ho negosiante sira ne’ebe fa’an hahan iha Pantai Kelapa iha Ministeriu Negosiu Estranjeiru nia oin, tanba governu determina tiha fatin ba sira maibe husik abandona.
Deputadu David Dias Ximenes hateten, tasi ibun la’os fatin atu fa’an sasan nian maibe fatin ba piknik nian e governu mos hatudu tiha fatin foun iha Bebonuk Hotel Arbiru nia oin atu negosiante sira fa’an iha ne’eba.
“Fatin ne’eba seguransa no uma mos iha tiha ona e sira sei nafatin iha ne’eba estraga nuu hun sira ne’eba ne’e nia dikin sira koa hotu tiha ona,” preokupa Deputadu husi bankada Fretilin, David Dias Ximenes, (04/04), iha PN.
Nia dehan, kestaun ne’e nia parte levanta dalabarak ona maibe to’o agora laiha rezultadu.
Hatan ba preokupasaun ne’e ,Koordenador Jestaun Jeral Merkadu Distritu Dili, Bonifacio Soares katak, sira kordena ona ho Xefe Suku Fatuhada no Xefe Suku Comoro inklui Ministeriu Komersiu Industria no Ambiente, buka meius oinsa para merkadu ne’eba bele funsiona fila fali.
“Klaru iha fulan Abril ne’e nia laran ami bele funsiona fila fali, ami agora sei koalia hela ho komersiu,” tenik Koordenador Soares hato’o.
Nia dehan, kona ba seguransa, bee moos no eletrisidade ba merkadu ne’e iha ona hein deit atu muda negosiante sira.
