Aguia Belo Ximenes, Diretor Ezekutivu Fundasaun Timor Harii (FTH) konsidera, problema ne’e seriu e Ministeriu Saúde tenke rezolve lalais tanba pasiente (HIV/SIDA) barak mak agora dadaun presiza aimoruk ne’e, atu prolonga tan sira nia vida moris.
“Aimoruk ARV ne’ebe expire, ida ne’e hau hanoin problema bo’ot ba Timor-Leste la’os buat halimar maibe serius tanba agora dadaun kolega balun konsume hela aimoruk ARV,” preokupa Diretor Belo, foin lalais, iha Salaun Delta Nova, Dili.
Nia dehan, agora dadaun pasiente sira presiza tebes aimoruk ne’e hodi hanaruk tan sira nia vida moris no prevene virus HIV atu da’et ba ema seluk ho fasil no lalais.
Entretantu Xefe Interino Programa HIV/SIDA iha Ministeriu Saúde, Costantino Lopes rekonese katak ne’e frakeza ministeriu nian, liu-liu sistema kontrolasaun stok aimoruk iha SAMES.
Tanba ne’e nia dehan, presiza halo kalkulasaun ne’ebe diak katak aimoruk ne’ebe atu hola ne’e ema nain hira mak konsume no durante fulan hira.
“Sistema kontrola aimoruk mak ladun diak, entaun ikus mai ita hakfodak aimoruk hotu,” dehan Xefe Lopes.
Maibe nia dehan, stok aimoruk inklui mos aimoruk ARV nian sei to’o mai iha Timor –Leste iha fulan ida ne’e nia laran, “ami mos kontaktu ona doadores balun hodi apoia aimoruk ARV nian,” tenik Xefe Lopes.
