Tuir Aurea Celina, Ofisial Planeamentu Familiar (PF) katak inan ida bele hetan (isin rua) tan mais ou menus tinan tolu, nune’e bele rekopera didiak inan sira nian ovariu.
“Ne’ebe planeamentu familiar la’os atu limita oan maibe atu fo espasu ba oan , atu nune’e bele rekopera inan sira nia saude,” hateten Aurea Celina,Offisial Programa PF, foin lalais, iha Hotel Oriental, Bebora, Dili.
Nia dehan,durante ne’e sira halo ona sosializasaun ba programa ne’e maibe seidauk masimu e sira sei kontinua atu nune’e labele iha kontroversi entre governu no igreja tanba igreja konsidera uza metodu kontrasepsaun modernu la foti feto nia dignidade.
Nia dehan, bainhira inan ida la halo espasu ne’ebe diak ba oan sira, ezemplu ; oan primeiru foin fulan neen deit kous fali ona, ne’e risku bo’ot ba inan nia saude tanba oan fatin (ovariu) seidauk rekopera fali . “Entaun inan ne’e bele hetan ran fakar, anemia no mos oan nia nutrisaun la diak,” katak ofisial PF ne’e.
Iha parte seluk, Doutora Triana Oliveira hateten Planeamentu Familiar la’os deit diak ba saúde inan,maibe diak mos ba saude labarik tanba oan sira presiza domin husi inan inklui garante nutrisaun ne’ebe diak ba sira.
Ministeriu Saúde, nia hatutan, iha planu estratejia atu halo sosializasaun ba populasaun kona ba PF atu komprende diak kona ba vantajen no desvantajen husi programa ne’e.
“Husi advokasia ne’ebe ami hala’o tiha ona iha nivel sub-distritu, tinan ida ne’e ami sei tama to’o iha nivel sukus no aldeia atu konsolida vantajen no desvantajen planeamentu familiar nian,” dehan Doutora Oliveira.
Doutora ne’e dehan, atu redus numeru mortalidade inan ho oan, ministeriu iha ona planu atu koloka pesoal saúde treinadu sira ba iha nivel sukus hanesan suku ida medikus ida, emfermeiru rua, parteira rua no tekniku laboratorium ida, hodi fo atendimentu saúde besik ba komunidade.
