Sekretariu Estadu Komunikasaun Sosial (SEKOMS), Nelio Isaac dehan iha seminariu durante tolu ne’e partisipante sira fo ideas barak atu oinsa mak bele esbosu lei ne’e sai lei ne’ebe diak iha future.
Nia hatutan, seminariu internasional kona ba esbosu lei ne’ebe ho tema “ Regulasaun Ba Meius Komunikasaun Sosial Harii Kultura Responsabilidade” ne’e kapas no importante tebes hodi regula servisu jornalista ho responsabilidade.
Nia konsidera kritika no sujestaun husi partisipante sira durante loron tolu (20-23 Marsu 2013) ne’e konstrutivu tebes atu bele elabora esbosu lei ne’ebe ho artigu 23 ne’e sai diak liu tan no mais espesifiku liu tan tanba draft lei ne’e seidauk final.
“Iha ideas barak mak mosu, hau hanoin katak depois de seminariu ne’e parese sei aumenta tan artigu balun iha esbosu ne’e tuir nesesidade,” dehan Sekretariu Estadu Komunikasaun Sosial, Nelio Isaac, (22/03), iha Hotel Timor, Colmera, Dili.
Maske iha Konstituisaun Republika Demokratika de Timor-Leste (RDTL) iha artigu 40 no 41 garante ona liberdade imprensa no espresa maibe tuir SE Isaac katak esbosu lei KOMSOS ne’e importante tebese ba jornalista sira atu professional liu tan iha sira nia profisaun ne’ebe ejiji mos responsabilidade.
Entretantu, Prezidente Asosiasaun Jornalista Timor –Lorosa’e (AJTL), Tito Filipe dehan, sei iha lakunas no frakeza barak iha esbosu lei ne’e, tanba ne’e labele ansi atu aprezenta esbosu ne’e ba iha Konselhu Ministru no Parlamentu Nasional.
“Presiza halo diskusaun no konsultasaun ho entidade kompetente sira atu hadia nune’e ba future labele fo impaktu ba jornalista sira,” tenik Prezidente Asosiasaun AJTL ne’e.
Nudar jornalista,nia agradese ba esforsu ekipa V nian ne’ebe elabora lei ne’e maibe esbosu lei ne’e jeral liu, la espesifiku tanba ne’e sira sei deskorda bainhira la espesifiku hodi garantia protesaun ba servisu jornalista sira.
“Ami hakarak diskusaun klean tanba ne’e ohin ne’e atu fo espasu ba jornalista sira atu fo ideias, la’os diskusaun taka asesor sira mai ho pontu devista rasik tanba lei ne’e sei aplika ba media la’os interese asesor sira nian,” preokupa Prezidente AJTL ne’e.
Hatan ba kesaun ne’e Sekretario Estado Nelio Issac hateten katak odamatan SEKOMS nakloke no pronto fo apoiu ba asosiasaun jonalista sira atu halo diskusaun ba esbosu lei ne’e tanba sei iha tempu atu halo diskusaun e intervensaun husi jornalita sira ba esbosu ne’e importante tebes.
“Hau lakohi ansi demais depois la hetan kualitas ne’ebe diak neineik maibe ho kualidade tanba ne’e hau dehan tempu sei iha depois de seminario ita sei elabora hau hanoin katak fulan Maiu pelumenus ita aprezenta ona iha Konselhu Ministru atu halo diskusaun ba draf final hafoin submete ba parlamentu,” dehan SE Issac.
Tuir obsevasaun jornalista durante diskusaun ne’e iha kritikas barak husi jornalista sira no asosiasaun jornalista sira tanba konsidera lei ne’e koalia liu konaba direitu no deveres jornalistas.
Iha esbosu lei artigu oitu (8) hetan kritika maka’as husi jornalista Radio no Televizaun Timor-Leste tanba iha artigu ne’e bandu jornalista sira sai funsiunariu publiku, enkuantu sira agora dadaun governu mak selu maibe sira servisu nudar jornalista.
Tanba ne’e Xefe Redasaun TVTL, Paulino Quintas sujere ba ekipa lima ne’ebe elabora esbosu lei ne’e atu ezepsaun ida ba jornalista RTTL sira iha esbosu lei ne’e.
