Prezidente Komisaun Nasional Direitu Labarik (KNDL), Komisaria Adalgiza Ximenes hateten, sira presiza hatama proposta ba iha organizasaun internasional sira hodi buka fundus tanba orsamentu husi governu ba KNDL ki’ik liu.
Nia dehan, husi Orsamentu Jeral Estadu ba tinan 2013 ne’ebe aloka ba Ministeriu Justisa, ba programa KNDL tinan ne’e ministeriu aloka deit $100,000 resin e orsamentu inklui ona ba salariu no bens servisu funsionariu KNDL nian.
“Entaun orsamentu ba programa ne’e ki’ik tebes, tanba ne’e mak ami halo lobi nafatin ba organizasaun internasional hanesan UNICEF, USAID maibe seidauk hetan resposta” tenik Prezidente KNDL, Komisaria Adalgiza Ximenes, foin lalais, iha Dili.
Ba selebrasaun loron mundial no nasional labarik ba tinan ida ne’e, Komisaria dehan, sei konsentra iha Distritu Oe-Cusse no sei hala’o aktividade hanesan sertame ba labarik sira iha Ensino Baziku no Sekundariu, game ba eskola infantile sira.
Alem de ne’e, nia dehan halo mos dialogu ho komunidade sira durante semana ida, halo advokasia hodi hasa’e sira nia konsiensia kona na direitu labarik.
Iha komemorasaun loron importante ne’e, KNDL mos sei fo atensaun ba kestaun trabalhu infantil sira liu –liu iha loron nasional ba labarik no loron trabalhu infantil ne’ebe monu iha dia 12 fulan Junu liu husi aprosimasaun ho lideransa local sira no inan aman sira atu fo atensaun ba kestaun ida ne’e.
Entretantu Prezidente Grupu Feto Parlamentar (GMPTL), Deputada Josefa Alvares Soares konsidera governu la tau atensaun ba problema labarik nian tanba aloka osan ba KNDL ki’ik maske sira iha planu estrategiku ne’ebe diak.
“Sira nia orsamentu ki’ik liu, ne’e signifika katak governu la fo atensaun maximu se governu fo atensaun duni tenke aloka osan tuir pedidu ne’ebe sira husu,” dehan Deputada Soares.
