Diretor Servisu Investigasaun Kriminal (SIK), Superintendente Calisto Gonzaga hateten, investigasaun tenke hala’o nune’e bele identifika inan se mak soe nia oan (bebe) sein iha sentiment.
“Agora dadun halo hela prosesu investigasaun hodi indentifika se’e los maka sai nia inan ba bebe ne’e,” dehan Diretor SIK, Superintendente Calisto Gonzaga, foin lalais, iha Kaikoli, Dili.
Kazu soe bebe ne’e rasik akontese iha area Bebonuk, Kampu Tuti iha Klinika Sao Miguel, iha loron Sabadu, (09/03/2013), tuku 09:00 kalan. E komunidade sira iha fatin ne’eba mak hetan bebe oan ho idade foin loron rua ne’e iha fatin lixu, depois sira telephone ba Polisia.
Maibe nia hatutan, bainhira polisia sira ba iha fatin akontesementu dekobre katak bebe oan ne’e nia isin lolon la kompletu ona, (diskunfia isin balun asu han tiha ona), entaun difisil oituan atu identifika seksu (jenis kelamin) ba bebe ne’e.
“Agora dadan bebe ne’e nia isin mate iha hela mortuariu para atu halo outopsia, hodi nune’e ita bele identifika ne’e feto ou mane,” dehan Diretor Gonzaga.
Iha lidun seluk Deputada Illda Maria da Conceicao, husu ba polisia atu bele halo prosesu investigasaun ne’ebe maka profunda ba kestaun ne’e atu nune’e bele hetan autor ba kazu ne’e.
“Polisia investigasaun tenke buka tuir se’e maka soe nia oan ne’e,” sujere Deputada da Conceicao.
Deputada ne’e apela ba feto maluk sira atu labele halo asaun ida ne’e tanba hahalok ida ne’e kontra ona ukun fuan Maromak nian e mos laiha moralidade.
