Koordenador Programa Hakbi’it Ekonomia Fundasaun Alola, Jose Sabino Ximenes katak, kada tinan hahu 2011 Embaixada Thailandia apoia finanseiru ba grupu feto vulneravel sira iha area rurais liu husi Fundasaun Alola, hodi hakbi’it feto sira nia ekonomia.
Nia dehan, Fundasaun Alola (FA) simu proposta barak husi grupu feto vulneravel sira iha area remotas maibe tanba fundus ne’ebe sira hetan husi embaixada Thailandia ho montante ki’ik entaun sei apoiu uluk grupo feto iha Distritu Oe-Cusse.
“Agora ami nia focus ba grupo feto distritu Oe-Cusse sira ne’ebe hatama ona sira nia proposta iha tinan kotuk maibe osamentu limitado agora ami fo prioridade ba sira grupo rua, atu hala’o negosiu hanesan fa’an modo, soru tais no seluk tan,” dehan Koordenador Jose Sabino Ximenes, foin lalais, iha Mascarenhas, Dili.
Maibe antes atu entrega osan ne’e ba grupu feto sira ne’e, nia hatutansei fo uluk kapasitasaun ba grupu feto sira oinsa rai osan no jere ho diak.
Ekipa Fundasaun Alola iha distritu sei halo monitorizasaun ba aktividade negosiu ne’ebe grupu sira hala’o, nune’e bele garantia nia ezekusaun ba fundus ne’ebe iha.
Entretantu Prezidente Grupu Feto Parlamentar (GMPTL), Deputada Josefa Alvares Soares hateten, iha organizasaun internasional barak mak fo apoia hodi hasa’e kapasidade feto iha vida politika no ekonomia maibe konesementu atu jere ne’e mak sei menus tanba ne’e importante mak fo formasaun antes.
“Hau hare katak ajudus ne’ebe fo ne’e doadores rasik tenke ser halo supervizaun ba ajudus ne’e tanba dala barak apoiu sira ne’e la jere ho diak,” sujere Deputada Soares.
Nia dehan, realidade durante ne’e akontese katak bainhira grupu feto sira iha area remotas ne’e hala’o negosiu maibe to’o iha dalan klaran paradu tiha.
