Deputadu Mateus de Jesus hateten, tuir lei ne’ebe maka iha farda military ne’e so Falentil Forsa Defeza Timor-Leste (F-FDTL) no Polisia Nasional Timor-Leste (PNTL) maka uja.
“Maibe realidade iha komunidade balun ne’ebe la’os F-FDTL no PNTL, uja farda sira ne’e ho arbiru, ne’e ita kontra ona lei ne’ebe mak iha,” kestiona Deputadu Mateus de Jesus, iha PN, foin lalais ne’e.
Tanba ne’e nia husu ba PNTL atu bele halo operasaun ba farda sira ne’ebe maka sei iha komunidade sira nia liman.
“Presiza halo atusaun ba komunidade sira ne’ebe maka uja farda military arbiru,” dehan Deputadu husi bankada Congresu Nasional Rekonstrusaun Timor, (CNRT) ne’e.
Hatan ba preokupasaun ne’e, Segundu Komandante PNTL, Komisariu Afonso de Jesus katak, sira iha ona rezulusaun husi Governu atu bele rekolha farda sira ne’e husi komunidade, ne’ebe maka la’os military.
“Numeru hau ladun hatene maibe hau hatene katak komandante distritu sira halo hela rekolhamentu ba farda sira ne’e,” dehan Komisariu de Jesus.
Maibe antes ne’e , nia dehan Polisia halo uluk sosializasaun ba komunidades kona ba rekolha farad military ne’e.
