Segundu Komandante Polisia Nasional Timor-Leste (PNTL), Komisariu Afonso de Jesus hateten, sira iha roo tolu duni ba Polisia Maritima (POLTIMA) maibe labele halo buat ida tanba kapasidade la to’o.
“Roo sira ne’e difisil atu tama ba iha tasi mane,” dehan Komisariu Afonso de Jesus, foin lalais, iha Kaikoli, Dili.
Nia dehan, roo tolu ne’e ida PNTL uja nia osan rasik hodi sosa naran Lusitania no rua seluk fali F-FDTL maka fo.
Ba future , Komisariu ne’e afirma, karik PNTL iha planu atu sosa tan roo, tenke halo dezenu ba roo bo’ot ida, ne’ebe mak bele hakur ba tasi mane.
Kona ba manutensaun, nia dehan, roo hirak ne’e diak hela tanba Governu mos prepara orsamentu ba kestaun ne’e.
Iha lidun seluk Deputada Ilda Maria da Conceicao hateten, kuandu kapasidade la to’o labele halo operasaun tanba ne’e perigu.
“Kondisaun tasi nian la hanesan, iha tasi feto ne’e nia onras ne’e kalma, ne’e roo bele la’o diak, maibe iha tasi mane ne’e nia onras ne’e boot, ne’ebe atu halo operasaun tenke hare didiak, se la’e bele estraga roo ou ita nia ema maka lakon,” dehan Deputada da Concecao.
Tanba ne’e nia sujere, atu labele ansi halo operasaun iha tasi mane nian, tenke hare kona ba kondisaun, ema ne’ebe lori roo ne’e preparadu ga la’e inklui mos kondisaun roo ne’e rasik.
