Deputadu Jacinto Viegas Roce hateten, komunidade sira, liu-liu agrikultor sira iha Maliana I preokupa no husu ba governu atu tau atensaun urgent ba problema ne’e.
“Agora dadaun husi parte agrikultura lori deit makaku ba tonka iha ne’eba tanba ponte ne’e atu tohar ona,” levanta Deputadu Jacinto Viegas Roce, foin lalais, iha plenaria Parlamentu Nasional, iha Dili.
Deputadu ne’e dehan, kuandu governu liu husi Ministeriu Agrikultura e Peska (MAP) la hadia, maka fo ameasas ba agrikultores sira nia hare ne’ebe balu foin kuda ba.
“Kuandu la hadia,populasaun sira nia hare hektares barak mak la aproveita kedas, tanba haree balun foin maka kuda,” tenik Deputadu Roce.
Entretantu Ministru Agrikultura no Pescas, Mariano Asaname Sabino dehan, sira labele halo buat ida tanba Orsamentu Jeral Estadu ba MAP tinan 2013 ne’e ki’ik liu, menus husi pursentu tolu (3%).
“Tanba ne’e ami laiha orsamentu ba kazu urjenti hanesan ne’e,” tenik Ministru Sabino.
Ministru Sabino dehan, sira nia parte liu husi diresaun agrikultura iha Sub-distritu Maliana halo ona atendementu ba kondisaun ne’e maibe seidauk masimu.
“Ami iha ona eskalador ne’ebe maka ami koloka iha fatin ne’eba para atu ajuda populasaun iha fatin ne’eba maibe ne’e mos la masimu tanba devia iha osan emerjensia ruma para atu hadia kuandu kanal irigasaun derepenti kotu,” dehan Ministru Asaname Sabino.
Ministru Sabino mos apela ba komunidade sira iha Maliana I, atu bele proteje saida maka governu halo ona, tanba obra iha Maliana I ne’e halo hela nia obra maibe komonidade balun ladun kolabora.
“Iha ema ida rua maka ba foti fali besi balun ne’ebe besik iha ninia induk ba sobu tiha, hanoin kala ne’e osan mean tanba besi ne’e nia kor mean ne’ebe sira estraga fali,” apela Ministru Sabino.
