Buka osan hodi sustenta familia la’os ona buat foun ba ema bo’ot maibe bainhira labarik minoridade ida mak buka osan hodi suporta fali moris familia nian ne’e mak problema no estadu presiza tau atensaun.
Trindade hala’o vida ne’e desde nia aman mate, hodi ajuda nia inan ne’ebe laiha servisu (permanente), nune’e bele hatutan moris familia uma laran nian.
“Ha’u nia moris lor-loron mak ajuda ha’u nia inan fa’an ai-fuan ou naran modo, nune’e hodi haree fali ba ha’u nia maun nia eskola, di’ak ida loron ida ami la’o hetan lima dollar,” dehan Nivio Trindade ne’ebe leba hela nia modo, iha Colmera, Dili.
Hanesan ho labarik sira seluk, antes ne’e nia mos eskola maibe hafoin nia aman mate nia deside para eskola maske triste tanba nesesidade la aguenta hodi sustenta sira nia moris.
“Ha’u la eskola tanbá laiha ema ida atu haree ami, fou-foun ha’u senti triste oituan tanbá labele kontinua ha’u nia estudu maybe agora ha’u bain-bain tiha ona naran katak ha’u nia maun alin sira nia future ne’e naroman,” katak Trindade ho esperansa.
Trindade nudar oan daruak husi maun alin nain tolu ne’ebe agora eskola hotu. Maske nia para eskola maibe nia iha mehi ida bainhira sai bo’ot, hakarak sai negosiante ne’ebe diak no hatene jere osan ho diak.
“Ba ha’u kontente tanbá uma laran iha maun alin nain rua mak kontinua eskola, ida dahuluk ne’e agora SMP no alin ikun kelas 2 SD iha Kaikoli, naran katak ami rua mama sosa sira nia sasán eskola,” Trindade dehan ho kontente.
Iha fatin seluk Pezidenti komisaun F (Saúde, Edukasaun,Kultura, Veteranus I Igualdade Jéneru) Virgilio da Costa Hornai hateten, iha kondisaun ekonomia balun halo família sira obrigatóriu nia oan buka osan estra hodi ajuda nia inan aman.
“Por ezemplu hanesan labarik sira iha dalan tesik ba kaikoli nian ne’e,labarik sira lubuk ida iha ne’ebá ita asisti,balun fase kareta,maibe lei bandu katak labarik sira minoridade labele ka’er servisu katak sira uza tempu ba eskola ho halimar, ” Deputadu Hornai dehan.
Nia hateten família sira mak ladun tau atensaun labarik katak sira mehi ba sira nia oan nia future mak ida ne’e ka ba di’ak liu nian, se future oan sira tenke ser di’ak entaun tenke prepara hela sira liu-liu oinsa mak sira ba eskola no labarik sira lakon oportunidade barak ba estudu.
“Ha’u hanoin inan aman tenke ser tanbá labarik sira ne’e mak hanesan fini ida entaun ita tenke prepara agora para aban bain rua produs rezultadu ida ba fatin ida ho di’ak no komesa agora eduka sira liu-iu fó tempu sira, no labele fali labarik sira mak sai tulang punggung ba ita nia vida ekonomia familia nian,” sujere Deputadu ne’e.
