Rofino Lopes, Inspektor du Trabalhu hateten numeru hirak ne’e bazea ba peskiza ne’ebe ekipa inspesaun du trabalhu hala’o durante tinan 2005-2009 nian e numeru ne’e la permanente, dalaruma tun no dalaruma sa’e.
“Labarik sekitar 100 resin mak hala’o servisu non formal hanesan fa’an manu tolun, sabraka, pulsa, fase kareta no seluk tan,” dehan Inspektor du Trabalhu, Rofino Lopes, iha Kaikoli, Dili.
Nia hatutan, maske seidauk bele identifika trabalhu infantil iha setor hotu maibe dadus ne’ebe sira iha, barak liu mak hala’o servisu non formal hanesan fa’an sasan baziku iha dalan ninin, no la’os formal hanesan halo konstrusaun.
Nia informa katak, labarik sira ne’e balun eskola no barak liu mak la eskola tanba ekonomia uma laran fraku no inan aman laiha (mate).
Atu kombate trabalhu infantil iha rai laran, tuir nia, presiza esforsu husi ministerio hotu-hotu, inklui ema hotu nia konsiensia atu labele haruka labarik hala’o servisu liu-liu inan aman sira tanba labarik sira barak liu inan aman mak haruka.
Entretantu Ministra Solidaridade Sosial (MSS), Isabel Guterres katak governu kontinua fo atensaun ba labarik sira ne’ebe iha luron ibun liu husi programa Bolsa de Mae ne’ebe trasa ona.
Nia dehan, sira sei esforsu atu servisu hamutuk ho inan aman no autoridade lokal sira atu hatene kauza husi labarik buka moris iha luron ibun no identifika sira hodi hetan apoiu husi governu.
“Husi governu mos ajuda ona fo osan ba inan aman sira bolu bolsa da mae hodi ajuda familia kbi’it la’ek atu supporta labarik sira ba eskola,” dehan Ministra Guterres.
