Acting Courtry Director Marie Stopes Internasional Timor-Leste (MSITL), Iram Saeed hateten programa sira ne’e importante tebes hodi hasa’e feto nia igualidade moris no saude atu nune’e feto mos iha oportunidade partisipa iha edukasaun, aktividade social, politika, ekonomia iha nasaun ida ne’e.
“Tinan-inan ita selebra atu onra mudansa feto nian no hanoin fali kona ba asaun ne’ebe ita presiza halo hodi feto hotu-hotu bele atinji no mantein igualidade iha sira nia vida tomak,” dehan Diretora Iram Saeed, iha aniversariu MSITL ba dala neen, iha Vila Verde, Dili.
Tuir estatistika ne’ebe iha, tinan 2012 klinika MSI fo ona atendimentu saude ba inan isin rua hamutuk 9,188 hodi garantia saudavel nafatin to’o tempu partus no fo ona atendimentu Planeamentu Familiar (PF) no akonselamentu halo espasu ba oan ba familia kaben nain hamutuk 20,455.
Nia hatutan, atendimentu ba moras hadaet liu husi relasaun seksual hamutuk 2,255 nune’e mos fo informasaun kona ba saude seksual no reproduktivu ba ema nain 234,016 iha distritu walu (8).
Entretantu Marie Stopes Internasional Timor-Leste harii iha tinan 2006, ho objetivu atu kolabora ho ministerio saúde hodi hatun mortalidade inan ho oan iha Timor –Leste.
Iha fatin hanesan, Reprezentante Parlamentu Nasional, Deputada Carmelita Caetano Moniz husu ba Ministeriu Saúde atu kolabora ho MSI liu husi baze legal ida hodi hametin liu tan relasaun servisu ne’ebe iha ona, liu-liu atu redus no prevene mortaliade inan ho oan inklui moras hadaet liu husi relasaun seksual.
“Ita hare katak governu mesak sei la halo buat ida entaun ho tulun organizasaun non governmental sira liu-liu MSI ne’ebe halo ona kontribuisaun ne’ebe diak tebes, hau husu ba ita bo’ot sira ba oin tur hamutuk hodi estabelese MOU ida atu hatun mortalidade inan ho oan no moras HIV/SIDA,” Deputada ne’e sujere.
