Deputadu Domingos Carvalho dehan durante ne’e sistema Polisia Imigrasaun hodi detekta ema illegal iha rai laran ladun diak no ema illegal barak los iha Timor laran tomak.
Nia dehan, dala barak ema estrangeiru tama mai iha Timor ho visa turista maibe realidade mai halo fali vida bisnis iha Timor.
“Sira mai ho visa turista, maibe to’o iha ne’e sira mai bisnis, entaun sira dada malu tama husi nasional to’o iha distritu, no tama to’o iha suku sira ne’e mos iha hotu ona,” dehan Deputadu Domingos Carvalho, iha Plenaria Parlamentu Nasional, foin lalais ne’e.
Tanba ne’e husi parte Sekretariu Estadu Seguransa kabe ba Polisia Imigrasaun tenke hare parte ida ne’e ho seriu, liu-liu kolabora ho Xefe Suku no Xefe Aldeia sira atu detekta ema sira ne’e.
“Ttinan ba tinan ema estrangeiru ne’ebe mak tama iha nasaun ne’e aumenta ba bebeik,” katak Deputadu Carvalho.
Hatan ba kestaun ne’e, Sekretariu Estadu Seguransa (SES), Francisco Guterres katak, agora dadaun sira servisu hamutuk hela ho International Polices (INTERPOL) hodi hare kestaun ne’e.
“Pur minimu kualker pasajeiru ne’ebe maka sai husi Singapura, Bali ho Darwin ami presiza hatene ema sira ne’e se se, no ita cross cek iha lista Interpol atu nune’e mos ita bele hatene keta halo ba ema sira ne’e mai ho problema, ita haruka sira fila,” dehan Sekretariu Estadu Guterres.
Nia hatutan, ema sira ne’ebe maka mai ho visa turista sira iha direitu atu mai Timor –Leste, maibe iha 30 dias primeiru depois 30 dias renova katak sira ne’e iha direitu atu hetan renovasaun to’o duaz vezes katak 90 dias, bele hela iha Timor-Leste.
“Maibe kestaun de kontrolu ne’e maka problema bo’ot, tanba ita seidauk involve xefe suku sira, xefe aldeia sira atu bele kontrola sira, e foin lalais ami iha ona diskusaun ida hamutuk ho parte komite imigrasaun ninian atu devini didiak problema sira ne’e para hare oinsa ita komesa involve autoridade lokal atu kontrola ema sira ne’e,” dehan Sekretariu Estadu Guterres.
