Komandante Polisia Transitu Nasional (POLTRANS), Inspector Xefe Antonio L.C.Soares dehan, estudantes sir abele tarde tuir sira nia aula aprendizajen kuandu halo operasaun tanba dalabarak liu sira mak tabele.
Nia rekonese katak, tuir Dekretu Lei Kodigu Estrada No.6/2003 katak mikrolete sira tenke tula ema nain 12 deit no labele liu.
“Maibe agora dadaun ne’e seidauk bele hala’o operasaun ba pasajeirus sira tanba wainhira hala’o estudante sira maka sai vitima,” hateten Komandante POLTRANS, Inspector Xefe Antonio L.C.Soares, iha Kaikoli, Dili.
Nia dehan, sira sei koordena ho Diresaun Nasional Transporte e Terestres (DNTT) para oinsa mak bele prepara bis ruma ba estudante sira nune’e dader no meiudia lori sira ba ida-idak nia eskola.
“Se iha tiha kareta ba estudante sira entaun ami bele hala’o duni operasaun, tanba tuir regra ne’ebé maka iha pasajeirus la bele tabele no tula iha laran la bele liu ema nain sanulu resin rua, se liu maka kondutor hetan sansaun,” tenik Komandante POLTRANS ne’e.
Durante ne’e nia afirma, sira hala’o ona operasaun maibe tanba estudante mak barak, entaun sira hapara tiha.
Iha parte seluk Deputadu David Dias Ximenes katak, POLTRANS nia servisu mak atu garantia seguransa ba ema nia vida, tanba ne’e sira tenke mantein iha estrada.
“Fo seguransa ema durante 24 oras, atu haree pasajeirus sira ne’ebé maka la’o ba mai tanba ema tabele kareta mak monu mate,ne’e dehan ita nia seguransa la iha,” dehan Deputadu Ximenes.
Nia mos fo ezemplu “ ema monu mate tiha ona maka ita dehan nia maka hakarak tabele, la’e ne’e viola transitu, i lolos ne’e sira haree mos iha mikrolet laran para tur iha laran ne’e pas ema nain 12deit,
la’os tur iha laran ne’e mos tur sa’e malu deit ne’e presiza fo multa para kondutor sira hatene,” Deputadu Ximenes sujere.
Tanba ne’e nia husu ba POLTRANS tenke halo operasaun para kondutor no pasajeirus sira hodi nune’e sira labele tabele barak no labele tula ema barak, se la halo seguransa maka sira bele halo hela deit.
“Sekuandu it dehan hala’o operasaun estudante maka vitima maibe sekarik sira monu mate ne’e vitima ga la’e,” kestiona Deputadu Ximenes.
