Tuir Prokuradoria Jeral de Republika (PJR), Anna Pesoa Pinto katak, loke delegasaun Ministeriu Publiku (MP) iha distritu tolu ne’e importante tebes, kazu sira husi distritu hirak ne’e labele mai hotu iha nasional.
“Ami loke tiha ona iha Sub-distritu Maliana, Distritu Ermera, nomos iha Distritu Viqueque,” informa Prokuradoria Jeral da Republika, Anna Pessoa Pinto,foin lalais, iha Parlamentu Nasional (PN).
Alem de ne’e nia dehan, ho orsamentu $ 6,000,000 ne’ebe aprova iha PN iha tinan kotuk (2012), sira konsege harii uma ba prokurador no ofisial justisa hamutuk 14 inklui uma hat ba delegasaun MP iha distritu tolu ne’e.
“Ida ne’e atu dehan katak osan povu nian ita gasta didiak, ita labele gasta saugate,” tenik PJR Pinto.
Nia hatutan, iha mos planu atu loke tan iha distritus sira seluk maibe presiza kompleta uluk difikuldade sira hanesan rekursu umanus ne’ebe seidauk sufsiente.
“Tanba ne’e hau husu governu, tenke aprova kuatru de pessoal para permite ami bele rekruta timor oan sira,” sujere Prokuradoria Pinto.
Iha lidun seluk Prezidente Komisaun A (konstitusionais, justisa, administrasaun, publika, poder lokal e anti korupsaun), Deputada Carmelita Caetano Moniz hateten, delegasaun hirak ne’e la’os foin harii iha distritu tolu ne’e maibe iha distirtu balun mos iha ona.
“Kondisaun ne’e hatudu katak Ministeriu Publiku atu habelar ona sira nia funsaun ba to’o iha distritu hotu-hotu atu fo atendementu ba povu liu-liu iha setor justisa nian,” dehan Prezidente Komisaun A, Deputada Carmelita Caetano Moniz. n
