Country Diretór Search For Common Ground (SFCG), José Fransisco de Sousa hateten, alende ne’e iha programa kontinuasaun ne’ebe uluk hala’o ona mak hanesan programa babadok rabenta, karau dikur ba dame hanesan drama series iha radio komuidade sira.
Nia dehan, radio hirak ne’e mak : Radio Komunidade iha 13 distritus, Radio Liberdade, Radio JOJO inklui radio rua husi akademika hanesan Radio Akademika UNTL no UNPAZ.
“Iha akordu ne’e iha mudansa oituan ho programa ne’ebé maka uluk halo tanba fo mos oportunidade ba radiu balun atu hamosu rasik sira nia kreatividade hodi hala’o programa ne’ebé maka sira senti bele halo e depois programa ne’ebé maka iha bele apar ho kontestu husi Distritu Dili,” informa Country Diretor SFCG, Jose Francisco de Souza, iha Marconi, Dili.
Entretantu Manager Program, Sandy Sequeira dehan, programas ne’ebe transmite iha 16 Radio Komunidade inklui radio sira seluk ne’e produs husi SFCG no Timor-Leste Media Development Center (TLMDC).
Nia esplika, kustu ba transmisaun liu husi Radio Akademika hamutuk $2,000 resin ( sira halo transmisaun deit) no kustu ba Radio Komunidade sira iha $5,000 resin tanba alem de transmite informasaun mos halo talk show.
“Ami nia planu programa istoria feto asesu ba justisa sei halo transmisaun iha fulan Abril no babadok rebenta sei halo tansmisaun iha fulan Maio, no programa karau dikur ba dame maka seidauk bele halo transmisaun tanba prosesu produsaun naruk,” Manager Program Sequeira informa.
Nia hatutan, sira mos sei loke oportunidade ba foinsa’e sira ne’ebe hakarak hakerek ‘radio drama’ kuandu iha kompetensia sei halo selesaun atu hakerek tan ba episode 25.
“Hau kontente los ho programa sira ne’e tanba iha distritu hotu eletrisidade estavel ona, tan ne’e sei apoiu sira atu halo transmisaun direita ba ita nia programa ho di’ak,” Manager Program esperansa.
Nia mos husu ba radiu parseiru sira atu halo tuir no hakruk ba akordu ne’ebé maka asina ona, iha asina akordu ne’e entrega mos ekipamentus hanesan tape record ba radiu parseiru hotu atu fasilita sira nia servisu.
Programa hirak ne’e SFCG hetan suporta husi USAID,Embaixada Norwegia no Uniaun Europeia.
Enkuantu Reprezentante Radio Komunidade Baucau, Dulce Santina Belo promote katak sira sei koko atu hala’o aktividade tuir MoU ne’ebe sira asina ona.
“Hau senti haksolok tebes ho asina kordu ne’ebé maka ami halo, sekarik SCFG bele organiza programa ne’e di’ak liu tan iha tinan ida ne’e atu nune’e ita bele servisu hamutuk hodi fahe informasaun ne’ebé maka ita nia komunidade sira presiza iha ita nia nasaun ida ne’e,” tenik Reprezentante Radio Komunidade Distritu Baucau ne’e.
