Tuir Deputadu Inacio Moreira katak, estrada ne’e grave tebes, no durante ne’e impede tebes aktividade populasaun sira iha fatin ne’eba.
“Los duni estrada iha Railaku atu ba Ermera ninian ne’e grave tebes, no ita nia maun alin sira ne’ebe maka lori kareta iha ne’eba ne’e tenke dada malu duni tanba estrada ne’e ladiak duni,” preokupa Deputadu Inacio Moreira, iha PN.
Deputadu ne’e mos dehan, agora dadaun Ministru Obras Publiku (MOP) ba hare ona no foti ona desizaun atu bele hadia estrada ne’e ho emergensia.
“Hau espera katak nia sei organiza hodi hadia lalais estrada iha Railaku ninian” Deputadu Moreira esperansa.
Nia mos sujere ba MOP atu fo projetu ne’e ba kompania ne’ebe mak iha duni kapasidade atu halo obra ne’ebe ho kualidade diak.
Hatan ba kestaun ne’e Engineering Estrada Nasional MOP, Jose Agusto katak, estrada ne’e at tanba udan no bee sa’e inklui rai monu no laiha manutensaun.
“Agora dadaun kompania hala’o hela servisu iha fatin ne’eba,” dehan Engineering Agusto.
Kona ba kompania se mak kaer projeitu ne’e, nia dehan nia laiha kohesementu tanba projeitu ne’e kategoria emergensia ne’ebe hetan kedas atendementu husi Ministru rasik.
