Engineering Estrada Nasional Ministeriu Obras Publiku (MOP), Jose Agusto hateten, tanba durante ne’e fatin sira ne’e maka wainhira udan hamosu inundasaun maka’as.
“Fatin sira hanesan iha Becora STM nian, Audian Cina Rate, Kaikoli no Likintai, fatin sira ne’e maka detektadu ona katak udan mai hamosu inudasaun ne’ebe mak bo’ot tebes,” informa Engineering Estrada Nasional, Jose Agusto, iha Mandarin, Dili.
Nia esklarese, obra iha Becora STM kaer husi Kompania BTK Unipessoal no agora dadaun atinji ona 66%, enkuantu iha Audian Cina Rate, no Kaikoli kaer husi kompania Samudra Unipessoal no agora dadaun atinji 66%, no iha Likintai kaer husi Kompania Turislau no agora dadaun atinji ona 20%.
Obras hirak ne’e halo duni ho emergensia maibe parte kompania tenke halo tuir prosesu normal ne’ebe maka trasa tiha ona.
“Hatama sira nia dezenu no prosesu sira seluk, ami seidauk halo kontratu ho sira tanba ne’e emergensia, hotu tiha maka ami bele halo kontratu ho sira,” esplika Engineering Agusto.
Iha lidun seluk Deputadu Eladio Faculto, senti urgulhu ho inisiativa hirak ne’e no espera katak bele responde ba inundasaun ne’ebe maka sempre mosu wainhira udan.
“Asaun ne’e hau louva tebes, baleta sira ne’e importante tebes tanba ita hare baleta balun metin tiha tanba foer sira, ne’ebe udan kuandu mai bee sa’e fali ba estrada no hamosu inundasaun,” Deputadu Faculto louva.
Tuir nia, wainhira obra ne’e remata, governu presiza halo deit manutensaun ba baleta sira ne’e atu nune’e baleta sira ne’e bele funsiona ho diak.
