Tanba ne’e Fundasaun Alola (FA) iha Programa Edukasaun nian kria livru ida ho titulu“ Livru Maka Janela Atu Haree Mundu” . Diretora Ezekutivu FA, Teresa Alita Verdial dehan kria livru ne’e ho objetivu atu hasa’e labarik sira nia kapasidade lee no hatene kona-ba mundu liu husi treinamentu ba professores sira.
“Livru ami mak dezenvolve rasik, ami nia rekursu e ami nia staf sira ne’ebé maka iha kapasidade natoon atu dezenvolve rekursu no rekursu ida ne’e mak ami uza ba iha treinamentu professores sira oinsa sira bele hanorin labarik sira e hatudu ba inan aman no komunidade sira oinsa atu lee livru,” hateten Diretora Ezekutivu FA, Teresa Alita Verdial, (22/02), iha Masscarenhas, Dili.
Nia hatutan, Fundasaun Alola servisu hamutuk ho Asian Foundation hodi dezenvolve rekursu inklui fornese treinamentu ba profesores sira.
Nia informa, programa ne’e hetan apoia finanseira husi Embaixada Amerika iha Timor-Leste ho montante rihun 60 resin dolares no espera katak ho orsamentu ne’ebe iha bele haforsa diak liu tan programa fo treinamentu ba profesores sira husi Ensino Baziku inklui dezenvolvementu rekursu umanu iha FA area edukasaun nian.
“Atu nune’e hasa’e liu tan promosaun lee ba labarik sira liu-liu iha literasia sira,” tenik Diretora FA ne’e.
Alende ne’e nia sublinha katak, Fundasaun Alola mos durante ne’e servisu hamutuk ho Ministeriu Edukasaun hodi fo treinamentu ba profesores nain 31 husi 13 distritus e sira ne’e ministeriu mak nomeia sira mai.
Entretantu Professora Honorina dos Santos promote katak hafoin treinamentu durante semana ida ne’e, sira sei aplika fali iha eskola hodi hanorin estudante sira iha infantile.
“Ha’u nudar professora husi TK Bernadete Aimutin, kontenti tebes tuir treinamentu literasia ne’e tanba ho treinamentu literasia ne’e bele aumenta ami nia kapasidade hodi hanorin ami nia estudante sira ho di’ak,” promote Profesora dos.
