Tuir Diretor Empregu Sekretariu Estadu Politika Formasaun Professional no Empregu (SEPFOPE), Paulo Alves katak trabalhador nain 1.188 ne’e kompostu husi nain 309 ba servisu iha Australia no 879 ba iha Koreia du Sul.
“Foin dadauk ne’e mos emprezariu balun husi Australia mai halo rekrutamentu direita tiha ona espera katak Novembru hanesan ne’e sira bele ba,” tenik Diretor Empregu, Paulo Alves, iha Balide, Dili.
Nia dehan, iha fulan kotuk barak mak tuir ezame prova oral ba Australia nian e tuir planu sira sei tuir prosesu treinamentu preliminariu iha area ospitalidade no hortikultura.
Trabalhador sira ba Australia nian, nia hatutan SEFOPE la fo formasaun direitamente hanesan ba Koreia nian e sira tenke hatene lian Ingles tuir rekizitus ne’ebé maka iha.
Kona ba nain 879 ne’ebe sei ba iha Koreia iha tinan ne’e, nia afirma atu priense ba kuota ne’ebe mak nasaun Koreia fob a hamutuk 3.500, nain 2.000 iha area fabrika no iha area peska nain 1.500.
“Bainhira sira ezame lian Koreia passa tiha, ita sei haruka sirab a tuir fali ezame selesaun ba mediku ninian, depois ezame mediku pasa ita haruka sira nia naran ba sistema de dadus iha Koreia do Sul para tama iha sistema da dadus ne’ebá,” hateten Diretor Empregu ne’e.
Tuir nia, iha tinan ida ne’e, fo tempu atu halo ezame dala rua iha tinan ida para atu kompleta kuota ne’ebé maka sira fo tanba kuota ne’ebé sira fo, Timor labele ense tanba ho razaun katak Timor Leste la iha ema ne’ebé tuir sira nia hakarak lolos.
Timor-Leste asina akordu ho nasaun rua ne’e, Australia iha tinan 2011 iha inisiu fulan Dezembru no Koreia iha tinan 2008.
Entretantu Joventude Jacob Freitas konsidera programa ne’ebé maka agora dadaun SEPFOPE hala’o ne’e kapas tanba iha tinan ida ne’e husi nasaun Ausrtalia no Koreia mos presiza ema barak atu ba servisu iha sira nia rain.
“ Ha’u espera katak iha tinan ida ne’e bele hamenus ona ita nia ema ho dezempregu iha ita nia rai laran ne’e tanba hare’e ba planu ne’ebé maka SEPFOPE halo ne’e iha tinan ne’e ema barak maka sei ba servisu iha ema nia rain,”Joventude Freitas esperansa.
Nia mos husu ba Timor oan ne’ebé maka agora dadaun iha ona ema nia rain, atu servisu ho disiplina hodi nune’e bele loke dalan ba maluk joven sira seluk ne’ebé maka seidauk hetan servisu iha Timor.
