Alzira Reis, Reprezentante Organizasaun Feto dehan, iha reuniaun Komisaun kona ba Statutu Feto (CSW) partisipa mos husi sosiedade sivil sira, ne’ebe Timor-Leste (sosiedade sivil) delega Diretora Forum Komunikasaun Feto Timor-Leste (FOKUPERS) no Responsavel Uma Mahon Psychosocial Recovery and Development in East Timor RADET.
Nia afirma, iha ne’e sosiedade sivil mos sei hato’o intervensaun ba area tematiku balun ne’ebe governu aprezenta hodi promove direitu feto iha rai laran.
Maibe antes ne’e, nia hatutan, sira halo enkontru ida hodi prepara hanoin ka intervensaun ba asuntu ne’ebe sei koalia iha forum ne’e.
“Espera katak ho reuniaun ida ne’e oinsa SEPI atu servisu hamutuk diak liu tan ho sosiedade feto hodi promove direitu feto nudar umanu hodi igual ho mane sira iha Timor -Leste,” esperansa Reprezentante Organizasaun Feto, Alzira Reis, iha Mascarenhas, Dili.
Nia sublinha katak, hafoin reuniaun, sosiedade sivil iha nasaun Asia (se-Asia) sei hamosu rekomendasaun ba governu nasaun membrus hotu atu implementa hodi promove direitu feto.
Entretantu husi Estadu Timor-Leste Sekretaria Estadu Promosaun Igualidade,mak partisipa iha forum ne’e nudar reprezenta Governu Timor –Leste iha Nova Yorke, durante semana rua.
Sekretaria Estadu Promosaun Igualidade (SEPI), Idelta Maria Rodrigues liu husi press release ne’ebe The Dili Weekly asesu, katak reuniaun hanesan ne’e kada tinan hala’o iha kuarte jeral Nasoens Unidas (ONU), hodi avalia progresu kona ba igualidade jeneru, identifika dezafiu, define padraun globál no elabora polítika konkretu hodi promove igualdade jéneru no progresu feto iha mundu tomak.
Iha reuniaun ne’e Sekretaria Idelta sei aprezenta Timor –Leste nia esforsu ba halakon forma hotu –hotu violensia hasoru feto no labarik sira nune’e mos sei esplika liu kona ba implementasaun planu asaun nasional ba violensia bazeia ba jeneru.
Reuniaun durante semana rua (4-15) fulan Marsu tinan 2013 ne’e ho tema “halakon no prevene violensia ba feto no labarik feto” ne’ebe sei koalia liu kona ba fahe responsabilidade igual entre feto no mane iha uma laran no servisu inklui mos problema moras transmisaun husi relasaun seksual (HIV/AIDS).
Alende partisipa iha reuniaun CSW ne’e, sekretaria estadu mos sei halo enkontru ho Diretor Ezekutivu Gabinete Prezidente Estadu Unidus da Amerika hodi troka hanoin kona ba partisipasaun politika no hakbi’it feto.
