Adjuntu Provedoria Direitus Humanus e Justisa (PDHJ),Silverio Pinto hateten, emprezaria feto mos iha kapasidade atu kaer projeitu bo’ot sira hanesan ho emprezariu mane sira iha Konsorsiu Nasional Timor (CNT).
“Hau hakarak hateten deit katak ne’e diskriminasaun ba emprezarias sira tanba ita hare iha CNT ne’e ami mane deit,” dehan Adjuntu PDHJ,Silverio Pinto, bainhira partisipa iha seminariu promove direitu feto iha setor privadu bazea ba implementasaun Lei Laboral, iha SalaunAsosiasaun HAK, Farol, Dili.
Nia dehan, durante ne’e projetu halo konstrusaun bo’ot –bo’ot sira iha rai laran ne’ebe kaer husi CNT ne’ebe sira nia membrus mesak mane deit. “Karik sira hanoin ida katak servisu konstrusaun ne’e mane nian, e hau hakarak dehan deit katak jere osan ne’e uza kakutak la’os fisikamente, entaun feto mos bele,” tenik Adjuntu PDHJ Pinto.
Adjuntu PDHJ ne’e rekonese katak, intermus de jestaun mane fraku liu duke feto sira tanba ne’e husu ba governu atu hadia situasaun ida ne’e tanba projeitu ne’ebe CNT manan ne’e la’os projetu ho montante osan ki’ik.
Iha fatin hanesan Reprezentante Asosiasaun Emprezarial das Mulheres Timor – Leste (AEMTL), Paula dos Santos hateten sira la involve iha CNT tanba la fo oportunidade ba sira.
“Ami emprezaria feto mos iha kapasidade atu kaer obra bo’ot sira iha rai laran, tanba obra ne’ebe durante ne’e sira halo uza kakutak mak hodi jere la’os fizikamente,e dalaruma kualidade diak liu fali emprezariu mane sira,” dehan Emprezaria dos Santos.
Tanba ne’e nia espera katak, governu bele fo oportunidade ba emprezaria feto sira atu kaer projetu bo’ot sira hanesan CNT sira hala’o dadaun ne’e.
“Durante tinan hirak nia laran oportunidade ida ne’e ami la hetan tanba governu sempre hanoin deit katak ne’e servisu mane nian,” preokupa atual Diretora Carpintaria Univen ne’e.
Entretantu Prezidente Board Rede Feto, Ivete de Oliveira promote sira (organizasaun feto) sei serviru hamutuk ho AEMTL hodi kria politika ida, halo advokasia ba governu atu fo mos oportunidade ba emprezaria feto atu involve iha projetu bo-bo’ot sira.
“Hau koalia ona ho prezidente AEMTL iha tinan kotuk, ami apoia malu kria politika ida hodi halo presaun ba governu fo oportunidade no konfiansa ba feto kaer projetu bo’ot sira ne’ebe ita hare durante ne’e domina husi mane,” dehan Prezidente Board Rede Feto ne’e.
Iha parte seluk, Deputada Maria Angelica Rangel da Cruz dos Reis hateten, ida ne’e akontese tanba mane sira sei minimize feto nia partisipasaun iha projetu bo’ot sira, maibe la signifika emprezaria sira hakiduk ba kotuk.
“Ita tenke hadia, la’os dehan diskrimina ona entaun ita feto hakiduk fali ba kotuk, ida ne’e hanesan tantangan bo’ot ida ba feto sira atu hatudu ba mane sira katak feto mos bele,” Deputada Rangel enkoraja.
