Tuir Xefe Departementu Banku Urgensia (BU) Ospital Nasional Guido Valadares (HNGV), Americo dos Santos katak, komunidade barak mak seidauk komprende didiak sistema atendimentu banku urgensia nian.
“Banku urgensia fo prioridade liu ba moras ne’ebe halo rujukan hosi sentru saude no ospital sira seluk inklui kazu asidente trafiku, sona malu, inan fakar ran, labarik isin manas maka’as, tanba moras hirak ne’e kategoria kazu urgensia ne’ebe presiza atende lalais,” hateten Xefe Departementu Banku Urgensia HNGV, foin lalais, iha Bidau, Dili.
Nia esplika, tuir lolos moras bai-bain hanesan mear, inus metin, isin manas, ulun mora no moras kma’an seluk la presiza mai iha BU, tanba Pesoal Saude (PS) iha ne’e sei menus.
Maske nune’e, nia dehan sira esforsu hodi fo tratamentu ba pasiente sira ne’e, vasta pasiente mak tenke iha pasensia hodi hein.
“Maibe ba futuru ita nia populasaun sira tenke hatene ospital ne’e ospital nasional, se hotu-hotu halai mai iha ne’e, susar,” Xefe Depratementu BU katak.
Iha parte seluk Membru Komisaun F (saude, edukasaun, igualidade jeneru, veteranus), Deputada Ilda Maria da Conçeicão katak, ne’e preokupasaun bo’ot ne’ebe Ministerio Saúde sira liu husi diresaun promosaun no advokasia ne’ebe presiza tau atensaun atu komunidade sira komprende sistema atendimentu iha BU.
“Hau hanoin husi ministerio mos tenke haruka sira nia ema no liu husi meius ne’ebe iha atu pasa informasaun ba ita nia komunidade sira atu iha konesementu kona ba sistema sira ne’e,” sujere Deputada ne’e.
