Armando da Costa, Diretor Jeral Interino Sekretaria Estadu Promosaun Igualidade (SEPI) hateten dialogu ne’e focus liu ba labarik feto no feto sira iha fatin ne’eba, tanba sira mak sai risku ba tipu violensia oi-oin ne’ebe bele mosu iha kualker tempu alende konflitu entre joven, bairo, arte marcias no problema hanesan moras HIV/SIDA.
Nia informa, aktividade dialogu feto iha paz no seguransa ne’ebe ho tema “Garantia Paz no Seguransa ba Feto hodi Promove Igualidade Jeneru” ne’e realize bazeia ba rezolusaun 1325 ONU nian ba nasaun post konflitu inklui Timor –Leste atu oinsa governu bele asegura paz no seguransa ba feto sira iha nasaun laran.
“Ita bo’ot sira ne’ebe moris iha fronteira ho movimentu ema no sasan ne’ebe maka’as bele mos fo risku ba ita bo’ot sira nia seguransa hanesan trafiku ema feto no labarik, moras HIV/SIDA, asaltu inklui mos abuzu seksual to’o ema balun lakon vida,” dehan Diretor Jeral interino, Armando da Costa, (25/02), iha Colmera, Dili.
Alende ne’e, nia hatutan, ekipa ne’e mos halo sosializasaun kona ba Lei Violensia Domestika no informa mos politika governu nian ba violensia bazeia ba jeneru ba komunidade iha area fronteira.
Aktividade ne’e realize tanba kolaborasaun servisu entre Grupu Trabalho Jeneru Distritu Suai (GTJ),Unidade Polisia Vulneravel (VPU), Unidade Polisia Fronteira (UPF) no autoridade local no hetan apoia finanseirus husi UN Women ho total $6.510.00.
Iha parte seluk Membru Komisaun F (Saúde, Edukasaun, Veteranus no Igualidade Jeneru), Deputada Ilda Maria da Conçeicão hateten dialogu ne’e importante tebes tanba durante ne’e seguransa ba feto no labarik ne’e minimu tebes.
“Tanba realidade violensia ne’ebe akontese hanesan problema arte marsiasis, feto no labarik barak mak sai vitima tanba ne’e dialogu sira hanesan ne’e importante tebes ba feto sira atu hato’o problemas ne’ebe sira hasoru iha sira nia moris relasiona ho seguransa,” tenik Deputada ne’e.
Deputada ne’e kestiona maka’as kona ba servisu GTJ durante ne’e tanba ne’e husu ba SEPI atu klarifika lolos servisu espesifiku ne’ebe durante ne’e sira hala’o ona,liu-liu iha nivel distrital sira.
