Koordenadora Programa Advokasia, Apolonia Maria da Costa katak foinsa’e barak mak seidauk bele koalia iha publiku tanba ne’e liu husi kapasitasaun baziku hanesan ne’e bele haforsa sira nia abilidade hodi koalia iha publiku nune’e bainhira sira involve iha grupu ruma bele halo influensia ba komunidade sira kona ba problemas ne’ebe akontese hanesan droga no moras HIV/SIDA.
“Ida ne’e hanesan informasaun baziku ida ba sira bainhira sira akaba sira nia estudu iha universidade no atu involve an iha grupu ruma sira iha ona abilidade atu uza sira nia kapasidade hodi implementa fali ba sira nia grupu,” dehan Koordenadora da Costa, (28/02), iha Sede Suku Kaikoli, Dili.
Nia informa, aktividade ne’e hala’o kada fulan iha suku Kaikoli, Mascarrenhas, Kintal bo’ot ho objetivu hasae kapasidade no konesementu foinsae sira nian kona ba oinsa koalia iha publiku inklui mos moras HIV/SIDA.
Iha fatin hanesan Partisipantes Veronica Barros hateten maske ho tempu ne’ebe limitadu maibe sira esforsu an atu aprende buat foun ruma husi formasaun ne’e, haforsa sira nia abilidade atu bele implementa fali konesementu ne’ebe sira hetan ba joven sira seluk.
“Ohin ami tuir formasaun kona ba public speaking atu prepara ami nia an hodi transforma informasaun hanesan droga no alkohol, moras HIV/SIDA ba maluk sira seluk liu –liu area remotas,” tenik Joventude Barros.
Treinamentu loron sorin ne’e koalia liu kona ba oinsa koalia iha publiku hanesan oinsa sai orador ne’ebe diak no oinsa atu kontrola emosaun bainhira koalia iha publiku.
Iha parte seluk, Xefe Suku Kaikoli, Hipolito Marques Sarmento, apresia ho kapasitasaun ne’ebe Fundasaun Alola (FA) fo ba joventude iha suku ne’e no espera katak sei aktividade hirak ne’e sei kontinua iha future.
“Agora dadaun ami iha ona planu atu servisu hamutuk ho organizasaun Fundasaun Alola atu dezenvolve kapasidade joventude sira iha suku laran,” dehan Xefe Suku Marques.
