Membu Komisaun F (saúde, edukasaun, igualidade jeneru, veteranus), Deputada Ilda Maria da Conçeicão, ba futuru Ministeriu Saúde tenke tau iha planu atu prepara pesoal saúde iha area matan nian tanba povu Timor barak mak iha problema ho matan.
“Ita presiza tebes tanba bainhira ita ba iha klinika matan nasional ita hare pesoal menus tebes satan iha distritus, hau hanoin laiha liu,” preokupa Deputada Ilda Maria da Conceicao, (26/02) iha Parlamentu Nasional.
Nia promote, sira sei bolu atensaun ba ministeriu atu tau atensaun ba ajente sira ne’ebe halo konsulta matan ba pasiente sira durante ne’e no fo bolsu estudu ba Timor oan sira kona ba matan nian nune’e bele fo atendimentu ba komunidade area rurais.
Iha parte seluk, Xefe Klinika Matan Nasional, Virgilio da Costa Pinto hateten pasiente matan kada loron barak tebes maibe pesoal mak menus, ema ida tenke halo servisu dupla kona ba fasilidade atendimentu sufsiente.
Tuir nia, kada loron ida sira fo atendimentu konsulta ba pasiente kuaze ema nain 70 resin maioria ho idade 50 ba leten hodi detekta pasiente ne’ebe presiza halo operasaun ba matan tanba iha problema ne’ebe fo impaktu ba sira nia matan hodi labele hare ona entau prepara orario hodi halo operasaun nun’ee sira bele hare hetan fali no ba sira ne’ebe presiza uza oklu mos iha.
“Difikuldade ne’ebe ami hasoru mak rekursu humanu ami seidauk to’o ne’ebe ema id abele halo servisu rua halai tun sae,” dehan Pinto.
Nia informa katak klinika matan nasional iha medikus espesialista ba matan Timor oan nain ida inklui mos medikus estrangeirus nain 3 hamutuk ho emfermeirus nain lima no tekniku professional husi organizasaun nongovernmental ne’ebe tama konta ba oklu.
Nia dehan numeru pasiente matan nian barak tebes entau sira mos kada fulan halo aktividade konsulta iha distritus atu fo atendimentu ba komunidade sira iha distritus mos liu –liu operasaun no asesu ba oklu tanba sira lao ho medikus espesialista estrangeirus sira.
