Diretora ezekutivu organizasaun Hiam Health, Rosaria Da Cruz hateten organizasaun nia misaun atu reforsa povu Timor no servisu hamutuk hodi hamenus kondisaun ne’ebe sosialmente la tolera iha uma laran entau tenke liu husi edukasaun tanba ne’e familia pasiente sira hela iha sentru rehabilitasaun laos atu hela deit no hein deit sira nia oan maibe familia hela atu simu edukasaun husi treinador sira konaba saúde nutrisaun inklui mos agriklutura ne’ebe garantia sustentabilidade aihan.
Meus ne’ebe uza hodi eduka familia pasiente sira mak liu husi TV, Pamfletu, poster, drama tanba koalia deit sen hatudu ezemplu no pratika direitamentu ba to’os difisil ba sira atu komprende.
“Ami hanorin sira konaba aihan ne’ebe bele fo fali seguransa ba sira nia saúde hodi protese sira nia isin ba moras,” dehan Diretora Rosaria Martins da Cruz, (22/02) iha Aimutin, Dili.
Nia informa katak pasiente sira iha obrigasaun tuir programa organizasaun nian hanesan dader familia pasiente tenke tuir edukasaun konaba saúde, Higiene, meudia tuir formasaun konaba demostrasaun tein aihan iha dapur organizasaun nian inklui mos parte lokraik nian pratika direitamentu konaba holtikultura hanesan halo kataderu, kuda fini, pestisida.
Directora ne’e informa katak hafoin pasiente sira alta husi sentru rehabilitasaun sira mos fo apoiu fasilidade no fini balun atu familia sir abele implementa fali iha sira nia bairo importante mos atu habelar fali material ne’ebe iha ba komunidade seluk.
Bazeia ba monitorizasaun no evaluasaun ne’ebe organizasaun halao ba iha familia pasiente sira durante ne’e hatudu katak iha progresu ne’ebe positive tebes tanba familia sira ne’e laiha tan sira nia membru ida mak monu fali ba iha malnutrisaun.
Iha parte seluk, familia pasiente sente apresia ho programa organizasaun nian ne’ebe hasae sira nia kapasidade konaba importansia nutrisaun ba labarik nia saúde no kualidade aihan inklui mos menu ne’ebe diak ba labarik nia nutrisaun.
Etelvina da Conçeicão Silva nudar inan husi pasiente promote katak sei implementa konesementu ne’ebe sira hetan husi organizasaun ne’e iha sira nia suku laran liu –liu programa horticultura nian atu asegra aihan ne’ebe ho nutrisaun ba labarik nia saude.
“Hau sei lori esperensia ne’ebe hau hetan iha ne’e liu husi trenamentu ne’ebe hau hetan hodi implementa fali iha hau nia uma laran liu –liu hau nia oan atu hetan saúde ne’ebe diak no hau sei habelar fali iha komunidade sira,” dehan inan Silva.
Nia informa katak nia rasik laiha kuinesementu konaba sentru rehabilitasaun ne’e tanba nia lori nia oan ba iha sentru saúde hodi tetu detekta katak nia oan nia kilo tun entau nia simu orientasaun husi pesoal saúde sira hodi kontantu organizasaun Hiam Health ba tula ami hodi mai iha ne’e atu halo tratamentu rehabilitasaun no simu edukasaun konaba nutrisaun.
