Antonio Cardoso, Reitor Universidade Dili (UNDIL) hateten sira kompleta ona rekizitus hodi priense prosesu akreditasaun husi Ministeriu Edukasaun liu husi Ajensia Nasional ba Avaliasaun no Akreditasaun Akademika.
“Ami iha ona preparasaun no la kleur tan ami submete ami nia rekerimentu ba akreditasau,n so ké ami mos tenke haree no la’o di’ak lai,” hateten Reitor UNDIL, Antonio Cardoso,(25/02), iha Mascarenhas, Dili.
Tuir nia,prosesu atu hetan akreditasuan iha tinan ida ne’e diferente ho tinan hirak liu ba ne’ebe determina husi governu maibe agora universidade ne’ebe mak hakarak hetan akreditasaun, sira mak tenke hatama sira nia rekerimentu ba akreditasaun nian.
“Ha’u apresia tebes ba Ministru Edukasaun nia lideransa iha kintu Governu konstituisionál ne’e,” Reitor UNDIL ne’e apresia.
Nia hatutan, akreditasaun iha nia modelu rua, primeiru koalia kona-ba akreditasaun instituisional no segundu kona-ba akreditasaun programa akademika nian.
Enkuantu Universidade ne’ebe seidauk hetan akreditasaun mak Universidade Dili (UNDIL) no Universidade Timor Oriental (UNITAL).
Entretantu Diretor Jeral Ministeriu Edukasaun (DJ-ME), Abrão dos Santos hateten prosesu atu hetan akreditasaun ba universidade rua ne’e, sira iha ona provatoriu dala rua (2008 no 2009) e to’o agora sira nafatin ho estatutu provatoriu nafatin.
“Ministeriu Edukasaun mos planeia ona atu halo avaliasaun ba instituisaun rua, UNDIL no UNITAL ne’e, tanba sira mos komesa haka’as an ona oinsa para atu eleva tan sira nia professores, fasilidades no aula de aprendizajen, sira komesa hadia dadauk ona,” tenik Diretor Jeral ME ne’e.
Nia hatutan,orsamentu aprovadu ona agora hein deit oinsa para ba futuru kontaktu fali ho sira iha universidade rua ne’e para halo preparasaun e depois sira submete fali sira nia rekezitu ba ministeriu hafoin kontaktu fali peritu internasional sira mai para bele halo avaliasaun ba terseira faze.
“ Osan aprova ona iha parlamentu, hein promulga husi prezidenti republika, kuandu osan ne’e iha no ba iha ministeriu ninia prosesu, sira bele halo preparasaun no kontaktu mos ba sira atu prepara ho di’ak liu tan hodi lori to’o iha faze avaliasaun,” esplika DJ dos Santos.
Nia hatutan,k atu hetan akreditasaun ne’e parte Ajensia Nasional ba Avaliasaun no Akreditasaun Akademika maka halo prosesu avaliasaun ba sira no mos ba Instituisaun Superior sira iha Timor laran tomak.
